Tags-Wahm

ye mirā vahm to kuchh aur sunā jaatā hai
ik gumāñ hai ki tirā aks dikhā jaatā hai

ho vahm kī dastak ki kisī paañv kī aahaT
jiine ke liye kuchh to ramaq chāhiye mujh ko

lā surāhī ki karūñ vahm-o-gumāñ ġharq-e-sharāb
is se pahle ki maiñ ḳhud vahm-o-gumāñ ho jā.ūñ

kabhī ḳhud ko chhūkar nahīñ dekhtā huuñ
ḳhudā jaane bas vahm meñ mubtalā huuñ

shab-e-ġham vahm suntā hai sadā.eñ
gumāñ hotā hai koī aa rahā hai

tire pā zamīñ pe ruke ruke tirā sar falak pe jhukā jhukā
koī tujh se bhī hai azīm-tar yahī vahm tujh ko magar na ho

ḳhūn-e-dil rag rag meñ jam kar rah gayā is vahm se
baḌh ke siine se na lipTā le mirā qātil mujhe

haigā vahm-o-qayās se bāhar
vo na tujh sā hai aur na mujh sā hai

abhī lā kī manzil-e-saḳht meñ huuñ fareb-o-vahm-o-gumāñ liye
mire dil meñ phir bhī basā huā tirā naam radd-e-balā sā hai

maiñ vahm se martā huuñ vahāñ ro.ab se us ke
qāsid kī zabāñ se nahīñ paiġhām nikaltā

ye vahm jaane mere dil se kyuuñ nikal nahīñ rahā
ki us kā bhī mirī tarah se jī sambhal nahīñ rahā

mirī bayāz ko sheroñ se tum sajā denā
maiñ ek vahm huuñ mujh ko yaqīñ banā denā

kabhī ye zom ki tū mujh se chhup nahīñ saktā
kabhī ye vahm ki ḳhud bhī chhupā huā huuñ maiñ

utaar de jo kināre pe ham ko kashtī-e-vahm
to gird-o-pesh ko girdāb hī samajhte haiñ

tū bharam hai aur na koī vahm hai
chhoḌ maayā ke jahāñ par ḳhaak Daal

hastī ke haq ke sāmne kyā asl-e-īn-o-āñ
putle ye sab haiñ aap ke vahm-o-ḳhayāl ke

lutf-e-suḳhan yahī thā ki ḳhud tum bhī kuchh kaho
ye vahm hai ki ab koī gosh-e-vafā nahīñ

dard ho to davā bhī mumkin hai
vahm kī kyā davā kare koī

aish-o-ġham-e-bāġh-e-dahr vahm hai Tuk gul ko dekh
chaak kiyā tū kahe maiñ kahūñ ḳhandāñ kiyā

vo ḳhud-parast hai aur ḳhud-shanās maiñ bhī nahīñ
fareb-ḳhurda-e-vahm-o-qayās maiñ bhī nahīñ