Tags-Wahm

vahm-o-gumāñ ke saa.e haiñ sūraj bhī chāñd bhī
andhī hai soch aur basārat bhī hai fareb

itnā to yaqīñ hai ki vahī haiñ tirī āñkheñ
is par bhī magar vahm-o-gumāñ aur hī kuchh hai

ruuh kyā hai ḳhudā ko hai ma.alūm
apne vahm-o-gumān meñ kyā hai

apnā ai 'tasnīm' is duniyā se ghabrātā hai dil
yaañ kī har shai ko faqat vahm-o-gumāñ paatī huuñ maiñ

maiñ kitnā vahm karūñ lekin ik shuā-e-yaqīñ
kahīñ navāh-e-dil-e-bad-gumāñ meñ rahtī hai

us ek vahm ne zinda rakhā kabhī merī
nazar kā lams tujhe gudgudāne vaalā hai

ye jo bhī ho bahār nahīñ hai janāb-e-man
kis vahm meñ haiñ dekhne vaale paḌe hue

banā ke vahm o gumāñ kī duniyā haqīqatoñ ke sarāb dekhūñ
maiñ apne hī ā.īne meñ ḳhud ko jahāñ bhī dekhūñ ḳharāb dekhūñ

ḳhud apnī fikr ugātī hai vahm ke kāñTe
ulajh ulajh ke mirā har savāl Thahrā hai

maiñ jin ke vahm-o-gumāñ ko faroġh detā huuñ
mujhe haqīr vo ḳhud ke sabab samajhte haiñ

guzartī hai bashar kī zindagī kis vahm-e-bātil meñ
jo aisā ho to aisā ho jo aisā ho to aisā ho

hamāre band kivāḌoñ pe dastakeñ de kar
shab-e-firāq meñ vahm-e-visāl detā hai

tishna-lab koī jo sar-gashta sarāboñ meñ rahā
basta-e-vahm-o-gumāñ bhāgtā ḳhvāboñ meñ rahā