Tags-Wahm

kahīñ unheñ na ho ḳhanda-labī pe vahm-o-gumāñ
dikhā de bekasī ai chashm-e-be-qarār baras

kuchh dahan hī nahīñ vahm-e-sho.arā ke nazdīk
mū se bārīk kamar bhī hai gumānī terī

log be-mehr na hote hoñge
vahm sā dil ko huā thā shāyad

bas ik gubār-e-vahm hai ik kūcha-gard kā
dīvār-e-būd kuchh nahīñ aur dar bhī kuchh nahīñ

tiflān-e-kūcha-gard ke patthar bhī kuchh nahīñ
saudā bhī ek vahm hai aur sar bhī kuchh nahīñ

na niklā vahm ke maare vo ghar se bhī 'sayyah'
galī se yaar ke tābūt jab mirā niklā

jo zuhūr-e-ālam-e-zāt hai ye faqat hujūm-e-sifāt hai
hai jahāñ kā aur vajūd kyā jo tilism-e-vahm-o-gumāñ nahīñ

mirī be-ḳhudī hai vo be-ḳhudī ki ḳhudī kā vahm-o-gumāñ nahīñ
ye surūr-e-sāġhar-e-mai nahīñ ye ḳhumār-e-ḳhvāb-e-girāñ nahīñ

naqsh-e-yaqīñ tirā vajūd-e-vahm bujhā gumāñ bujhā
kār-e-habīb ke tufail rauzan-e-rā.egāñ bujhā

Dubo degā hameñ ḳhud nāḳhudā hī
na thā is kā kabhī vahm-o-gumāñ tak

na ibtidā kī ḳhabar hai na intihā ma.alūm
rahā ye vahm ki ham haiñ so vo bhī kyā ma.alūm

diyā vo jo na thā vahm-o-gumāñ meñ
bhalā maiñ aur kyā māñgūñ ḳhudā se

maiñ jī rahī huuñ yā jiine kā vahm hai mujh ko
na-jāne jaag rahī huuñ ki so rahī huuñ maiñ

dil pahuñchā achānak hī tayaqqun kī fazā tak
sab vahm-o-gumāñ ishq kī asnād se nikle

thā mujhe vahm-o-gumāñ kī vo faqat merī hai
aur us ne bhī bharam merā banā.e rakkhā

is vahm se vāpas nahīñ palTā huuñ ki hogā
kuchh aur bhī is ḳhvāb-e-tilismāt se aage

kyā vahm thā ki khulte hī lab band ho ga.e
kyā baat thī ki lafz bhī puurā nahīñ kiyā

mujhe yaqīñ na milī tujh ko daulat-e-bedār
mujhe ye vahm mile Dher sīm-o-zar ke mujhe

asiir hai mirī khīñchī huī lakīroñ kā
ye vahm hai ki vo mere asar se bāhar hai

ek anokhī lai se maiñ ne sab ke dil pighlā.e haiñ
duniyā ko ye vahm ki mere hoñToñ par hai apnī baat