Tags-Wahm

har ek samt yaqīñ kī naqāb oḌhe hue
har ek paikar-e-vahm-o-gumāñ dikhā.ī diyā

ḳhayāl-o-vahm se bartar hai us kī zaat so vo
nihāyat-e-havas-e-ḳhadd-o-ḳhāl hai shāyad

be-vahm-o-gumāñ raah meñ mil jaate ho aksar
dānista kahāñ mujh se mulāqāt karo ho

mirī talāsh meñ gum haiñ musāfirān-e-adam
hudūd-e-vahm se aage nikal gayā huuñ maiñ

rukā huuñ kis ke vahm meñ mire gumān meñ nahīñ
charāġh jal rahā hai aur koī makān meñ nahīñ

bahār o ḳhizāñ kam-nigāhoñ ke vahm
bure yā bhale sab zamāne tire

ham ko ek bahut hī baḌī sachchā.ī ko afsāna karnā hai
ḳhuub piyeñge sharāb-e-vahm aur ḳhuub ḳhayāl-e-ḳhām kareñge

ik vahm kī sūrat sar-e-dīvār-e-yaqīñ haiñ
dekho to haiñ maujūd na dekho to nahīñ haiñ

tamām umr bhaTakte rahe jo sahrā meñ
unheñ ye vahm ki vo rāsta dikhāte haiñ

fariyād kījiye na koī zulm Dhā.iye
ik vahm hai shikast-o-zafar raqs kījiye

josh-e-shorīda-sarī thā tā-ba-vahm-e-iḳhtiyār
thak ke dam TuuTā to phir ārām hī ārām thā

vahm bhī ho jaatā hai dil ko lekin is meñ ta.ajjub kyā hai
aise dasht ki jin meñ sham.eñ aap hī aap jalīñ, milte haiñ

ab tak haiñ is gumāñ meñ ki ham bhī haiñ dahr meñ
is vahm se najāt kī sūrat nahīñ milī

pyaar hotā hai yā nahīñ hotā
is meñ vahm-o-gumāñ nahīñ hote

guzishta raat mujhe paḌhte vaqt vahm huā
varaq pe harf nahīñ haiñ ye haiñ kitāb meñ saañp

bad-gumāñ ishq ko sad vahm-o-yaqīñ ke khaTke
shoḳhī-e-chashm suḳhan-sāz hai ġhammāz judā

ālam-e-ishq meñ allāh-re nazar kī vus.at
nuqta-e-vahm huā gumbad-e-gardūñ mujh ko

na ibtidā kī ḳhabar hai na intihā ma.alūm
rahā ye vahm ki ham haiñ so vo bhī kyā ma.alūm

ibrat se pūchh dard-e-pareshānī-e-nigāh
ye gard-e-vahm juz basar-e-imtihāñ nahīñ

mahfil-e-rāz meñ ham sah ga.e har vahm kī choT
āḳhir ik ishq kā me.aar banā kar uTThe