Tags-Wahm

tujh sā hasīñ aur ḳhūn-e-mohabbat
vahm hai shāyad surḳhi-e-dāman

ġhāfil ba-vahm-e-nāz ḳhud-ārā hai varna yaañ
be-shāna-e-sabā nahīñ turra gayāh kā

mire ai dil-e-alam-āshnā kisī vahm meñ na ho mubtalā
tujhe rakh sakeñge vo yaad kyā kabhī jin kā dil hī dukhā nahīñ

zindagī meñ dekhne the ye bhī din 'ḳhāvar' hameñ
jo kabhī bichhḌe na the vahm-o-gumāñ se jā chuke

use yaqīn ke sūraj se hī ubharnā hai
vo sail-e-vahm meñ bahtā huā jamāl nahīñ

tū ḳhvāb hai ehsās hai naġhma hai ki gul hai
ye kashmakash-e-vahm-o-gumāñ maar na Daale

vahm aate haiñ dekhiye kyā ho
vo akelā makān se niklā

yaqīn aaj bhī vahm-o-gumān meñ gum hai
zamīn jaise kahīñ āsmān meñ gum hai

niiñd aa.ī hai fasāna-e-gesū-o-zulf se
vahm-o-gumān-e-ḳhvāb-e-pareshāñ nahīñ rahā

zi-bas ḳhūñ-gashta-e-rashk-e-vafā thā vahm bismil kā
churāyā zaḳhm-hā-e-dil ne paanī teġh-e-qātil kā

koī dastak na koī aahaT thī
muddatoñ vahm ke shikār the ham

har ghaḌī vahm meñ guzre haiñ na.e aḳhbārāt
tire kūche meñ gumāñ apnā ye jāsūs huā

jo bhī kar jaur-o-sitam jo bhī kar ehsān-o-karam
tujh pe ai dost vahī vahm-o-gumāñ hai ki jo thā

laakh kar jaur-o-sitam laakh kar ehsān-o-karam
tujh pe ai dost vahī vahm-o-gumāñ hai ki jo thā

maiñ barg-e-shikasta huuñ dast-e-havā par
faqat merā vahm-o-gumāñ ye khule par

maiñ vahm huuñ ki haqīqat ye haal dekhne ko
giraft hotā huuñ apnā visāl dekhne ko

ḳhayāl thā ki vo abr is taraf se guzregā
so ye bhī 'jānāñ' thā vahm-o-qayās āñkhoñ kā

rāz-e-nihāñ thī zindagī rāz-e-nihāñ hai aaj bhī
vahm-o-gumāñ meñ thī vahm-o-gumāñ hai aaj bhī

kuchh to hai zikr se dushman ke jo sharmāte haiñ
vahm meñ Daal diyā un kī hayā ne ham ko