Tags-Wahm

vo aur hoñge jo vahm-o-gumāñ ke saath chale
ham apnī raah pe azm-e-javāñ ke saath chale

soch rahī huuñ naam pe apne chauñk ke pīchhe muḌte hue
vahm thā merā yā phir sach-much terī hī vo thī āvāz

harīm-e-anvār-e-sarmadī hai har ek zarra ba-rabb-e-kāba
mirā ye ainī mushāheda hai fareb-e-vahm-o-gumāñ nahīñ hai

naqqād apne aap kā be-lāg aisā kaun hai
honā mirā ik vahm hai dekhūñ ye kahtā kaun hai

chal ḳhud ko laTkā kar dekheñ phande se
vahm mujhe aksar aate haiñ gande se

vahm the merī taraf se bad-gumānī thī unheñ
merī fitrat dekh ke ab e'tibār aa hī gayā

kis gahre añdhere ke tazabzub meñ ghirī huuñ
ḳhāmosh hai dīvār yaqīñ vahm kā dar chup

ai rashk itnā vahm-o-gumāñ bhī bajā nahīñ
ehsās-e-qurbat-e-rag-e-jāñ par na aa.e harf

hastī-e-ālam-e-hushiyār ho ki ho apnā vajūd
sab kuchh ik vahm-e-musalsal ke sivā kuchh bhī nahīñ

sab kā chehra tere jaise kyuuñ hai
ye mujhe vahm sā hotā kyuuñ hai

vālihāna mire dil meñ mirī jaañ meñ aa jā
mere īmāñ meñ mire vahm-o-gumāñ meñ aa jā

ye mauj-e-tāza mirī tishnagī kā vahm sahī
maiñ is sarāb meñ sarshār rahnā chāhtā huñ

duniyā kā tamāshā dekh liyā ġhamgīn sī hai betāb sī hai
ummīd yahāñ ik vahm sī hai taskīn yahāñ ik ḳhvāb sī hai

kaun aayā hai mire pīchhe ye kaisā vahm hai
maiñ Thahar jaatā huuñ har ik moḌ par kis ke liye

ham log sifāt us kī bayāñ karte haiñ varna
hai vahm o ḳhirad se bhī pare zaat kā aalam

vahm o idrāk o ḳhayālāt o dil o ḳhvāhish-e-dil
sab to apne haiñ magar kyuuñ nahīñ qaabū apnā

aag bhaḌkī jab to maiñ ye sochtā hī rah gayā
kāġhzī kapḌe mujhe kis vahm ne pahnā.e the

kis ne har shai ko kiyā vahm-o-gumāñ meñ mubtalā
ho gayā saaya mirā mujh se hī munkir kis liye

vo dekh Dah chukīñ vahm-o-gumāñ kī dīvāreñ
yaqīn chīḳh rahā hai qayās rahne de

tere liye jo vahm hai un ke liye yaqīñ
akasr yahāñ gumān ke mehvar bhī ā.eñge