Tags-Wahm

vahm ye tujh ko ajab hai ai jamāl-e-kam-numā
jaise sab kuchh ho magar tū diid ke qābil na ho

kaise kaise vahm palte haiñ bashar ke zehn meñ bhī
chand jur.e sher kā ḳhūñ-nosh karnā raat ko maithan se pahle

gaah qarīb-e-shah-rag gaah ba.īd-e-vahm-o-ḳhvāb
us kī rafāqatoñ meñ raat hijr bhī thā visāl bhī

maiñ vo āzurda-e-vahm-e-musarrat huuñ ma.āz-allāh
ki ġham ko ġham samajhne se bhī ghabrātā hai dam merā

zindagī kyā hai ba-juz vahm-o-gumāñ mere liye
ye zamīñ jab ho ga.ī be-āsmāñ mere liye

khilegā niiñd ke sahrā meñ jo bhī phuul 'sājid'
varā-e-lazzat-e-vahm-o-gumāñ raushan rahegā

dukh kī baat to ye hai 'shāriq'
us kā vahm bhī sach niklā hai

tū sirf merī hai is kā ġhurūr hai mujh ko
agar ye vahm mirā hai to koī baat nahīñ

koī bhī shaḳhs jo vahm-o-gumāñ kī zad meñ rahā
vo tā-hayāt azāb-e-qubūl-o-rad meñ rahā

manzilat sher kī tire 'saudā'
yuuñ ba-vahm-o-gumāñ paḌtī hai

tamām vahm o gumāñ hai to ham bhī dhoka haiñ
isī ḳhayāl se duniyā ko maiñ ne pyaar kiyā

harzā phirne se tire gosha-nashīnī behtar
vahm-o-shak aur gumāñ chhoḌ ke īqān meñ aa

tire ḳhayāl meñ apnā guzar nahīñ hotā
jo dil se gir ga.e vahm-o-gumāñ meñ rahte haiñ

aaj chhū leñge koī arsh mire vahm-o-gumāñ
ḳhvāb ko niiñd kī āñkhoñ meñ machalne deñge

duniyā hai kār-ḳhāna-e-vahm-o-gumāñ tamām
sachche vahī fasāne the jo aam the bahut

maiñ huuñ āzād kab zamāne meñ
qaid-e-vahm-o-gumāñ meñ rahtā huuñ

ghar thā yā koī aur jagah jahāñ maiñ ne raat guzārī thī
yaad nahīñ ye huā bhī thā yā vahm hī kī ayyārī thī

ik sahm hai ki har kahīñ rahtā hai saath saath
ik vahm hai ki aaj bhī dil se gayā nahīñ

jhūToñ kabhī pūchhā hai to vahm aa.e haiñ kyā kyā
mānūs haiñ itne tirī begāna-ravī se