Tags-Wahm

phir ruuh ke kāġhaz pe khiñchī hai koī tasvīr
hai vahm ki ye shakl kahīñ dekhī huī hai

jaane kyuuñ guftār pe us kī vahm-o-gumāñ ke saa.e the
baat to us kī sīdhī sī thī lahja kuchh kuchh mub.ham thā

vahm kā paikar thā āvezāñ dar-o-dīvār par
khiḌkiyoñ meñ chāñd mahv-e-jalva-ārā.ī na thā

ye mirā vahm hai yā mujh ko bulāte haiñ vo log
kaan bajte haiñ ki mauj-e-guzarāñ boltī hai

vahm kī gard meñ lipTe haiñ savāl aur hameñ
kabhī naf.i kabhī isbāt se ḳhauf aatā hai

but-gar hai na koī but-shikan hai
sab vahm-o-gumān-e-brahman hai

jab jalva-hā-e-vādī-e-aiman nazar meñ hoñ
ḳhātir se vahm-e-rauza-e-rizvāñ nikāliye

kabhī sunte the ham ye zindagī hai vahm o be-ma.anī
magar ab maut ko bhī ḳhatra-e-bātil samajhte haiñ

thā mujhe vahm-o-gumāñ ki vo faqat merī hai
aur us ne bhī bharam merā banā.e rakkhā

bahut tañg hai vahm-e-hastī kī duniyā
maiñ aalam hī ab dūsrā chāhtā huuñ

kisī bhī vahm ko ḳhud par savār mat karnā
ḳhayāl-e-yār ko gard-o-ġhubār mat karnā

vahm-e-ġhalat-kār ne dil ḳhush kiyā
kis pe na jaane vo nazar kar gayā

vaqt ke har ik naqsh kā ma.anī itnā badlā badlā hogā
mere vahm-o-gumān meñ kab thā ishq kā manzar aisā hogā

sāmne ghar ke tire koī khaḌā thā jaise
vahm apnā tirī dīvār kā saayā niklā

pahre baiThe haiñ qafas par ki hai sayyād ko vahm
par-shikastoñ ko bhī ik rabt hai parvāz ke saath

mujh ko amaañ ho qarya-e-vahm-o-gumān meñ
de kar yaqīn dil se tū ḳhadsha nikāl de

zamīñ pe aa.e na aa.e ye vahm hai sab ko
ḳhalā kī god meñ paltā hai hādsa koī

udhar vo aur ā.īna hai aur kākul banānā hai
idhar vahm aur ḳhāmoshī hai aur dil meñ bigaḌte haiñ

parda-e-chashm pe raqsāñ hai tirā aks hunūz
so bas ik vahm hai ye kār-gah-e-sā.at-e-hijr

yā mujhe vahm hai suntā nahīñ koī merī
yā ye duniyā hī koī koh-e-nidā ho jaise