Tags-Wahm

nazar aa.eñ tire chehre ke ḳhad-o-ḳhāl tamām
dil se uTh jaa.eñ kabhī vahm ke saa.e to bane

haa.e ab tak vahī andāz-e-nazar hai us kā
ab bhī ik silsila-e-vahm-o-gumāñ baaqī hai

ho ke majbūr-e-tamāshā vahm kī tasvīr se
lazzat-e-zauq-e-nazar barbād kar letā huuñ maiñ

ye ik chhalāvā hai ki pahāḌoñ kī aag hai
vahm-o-gumāñ kī shakl meñ jaise yaqīñ hai shaam

be-asar ho jaa.e jis se dil kā zaḳhm-e-ātishīñ
marham-e-vahm-o-gumāñ maiñ bhī nahīñ tū bhī nahīñ

yaañ kā na honā bhī vahm hī hai
butlān kis kā tahqīq kaisī

manzileñ aur bhī haiñ vahm-o-gumāñ se aage
ham ko karnā hai safar qaid-e-makāñ se aage

ai mere ḳhurshīd-e-shabī kyā vahm-e-tulū-o-ġhurūb tujhe
ek tirī gardish aisī thī ḳhāna-e-dil be-nūr rahā

vo aur itnā pareshāñ-ḳhātir rabt-e-ġhair kī baat nahīñ
lekin us ke chup rahne se dil ko vahm zarūr rahā

jis roz yaqīñ aa.egā mar jā.eñge us din
rahne do mohabbat ko yūñhī vahm-o-gumāñ tak

rah-e-hayāt meñ vahm-o-gumāñ ke saa.e haiñ
nazar meñ azm-o-yaqīñ ke ayāġh raushan kar

rahe dil meñ vahm-o-gumāñ kaise kaise
sarā meñ Tike kārvāñ kaise kaise

jis kī dīd-o-talab vahm samjhe the ham rū-ba-rū phir sar-e-rahguzār aa gayā
sub.h-e-fardā ko phir dil tarasne lagā umr-e-rafta tirā e'tibār aa gayā

kuchh nahīñ hai zehn meñ to vahm kī shakleñ banā
raushnī hogī agar saa.e nazar aane lage

mirī nazroñ kī pahnā.ī meñ haiñ ajzā-e-do-ālam
gumān-o-vaham kī parchhā.iyāñ kuchh aur kahtī haiñ

jo baat jhuuT hai sach kaise maan luuñ us ko
batāo duur ye vahm-o-gumān kaise ho

nasheb-e-vahm farāz-e-gurez-pā ke liye
hisār-e-ḳhāk hai had par har intihā ke liye

aag ke phuul pe shabnam ke nishāñ DhūñDoge
tum haqīqat ke liye vahm-o-gumāñ DhūñDoge

tere hasīn jism kī phūloñ meñ boss hai
go vahm hai ye vahm qarīn-e-qayās hai

libās-e-gul meñ vo ḳhushbū ke dhyān se niklā
mirā yaqīn bhī vahm-o-gumān se niklā