Tags-Wahm

tujhe ye vahm ki maiñ tujh se be-ta.alluq huuñ
mujhe ye dukh ki tire halqa-e-asar meñ huuñ

the jitne vahm-o-gumān vo sab na.ī haqīqat meñ Dhal chuke the
ik aadmī par kalām-e-parvardigār utrā to maiñ ne dekhā

vo faqat mere liye paidā hue haiñ 'shohrat'
kaun sā lamha thā jab vahm ye guzrā thā mujhe

piyo ki mā-hasal-e-hosh kis ne dekhā hai
tamām vahm-o-gumāñ hai tamām dhokā hai

jab ek ḳhvāb kā maḳhmal ho tār-tār 'nadīm'
maiñ dasht-e-vahm meñ phir ik sarāb buntā huuñ

ulajh gayā huuñ kuchh aisā ki yaad bhī to nahīñ
ye vahm pahle-pahal kaise dil meñ aayā thā

is vahm kī intihā nahīñ hai
sab kuchh hai magar ḳhudā nahīñ hai

'najīb' ik vahm thā do chaar din kā saath hai lekin
tire ġham se to saarī umr kā rishta nikal aayā

apne markaz ko ik vahm samjhā kiyā aql kā dā.era
jis ko kuchh apne dām-e-kashish ke sivā dil nahīñ māntā

is mulāqāt kā is baar koī vahm nahīñ
jis se ik aur mulāqāt kī sūrat nikle

jab manziloñ vahm thā na shab kā
maiñ niklā huā huuñ ghar se tab kā

fahm laakh suljhā.e vahm laakh uljhā.e
husn hai haqā.eq kā kyā ḳhayāl mere haiñ

vahm-e-ta.ayyunāt kā anjām dekhnā
nazdīkiyoñ ko duur kiye jā rahā huuñ maiñ

ye yaqīñ hai ki pahuñch jā.eñge un tak ik din
chaliye be-vahm-o-gumāñ aur zarā tez qadam

vahm jaisī shukūk jaisī chiiz
umr hai bhūl-chūk jaisī chiiz

chhoḌ kar bār-e-sadā vo be-sadā ho jā.egā
vahm thā merā ki patthar ā.īna ho jā.egā

tamām umr hī vahm-o-gumān meñ guzrī
mirī to pyaas sarāboñ ke dhyān meñ guzrī

ye vahm-e-duī dil se judā karnā thā
is qatre ko dariyā meñ fanā karnā thā

alvidā.a ai zo.am-e-hastī al-firāq ai vahm-e-zīst
maut ban kar muzhda-e-umr-e-davām aa hī gayā

musāfiroñ ke ye vahm-o-gumāñ meñ thā hī nahīñ
ki rāhbar to koī kārvāñ meñ thā hī nahīñ