Tags-Wahm

badan simTā huā aur dasht-e-jāñ phailā huā hai
so tā-hadd-e-nazar vahm o gumāñ phailā huā hai

yuuñ luTā hai gulshan-e-vahm-o-gumāñ
koī ḳhār-e-bad-gumānī bhī nahīñ

bachā liyā tirī ḳhushbū ke farq ne varna
maiñ tere vahm meñ tujh se lipaTne vaalā thā

tasavvuroñ ke fareb uThā kar mushāhida vahm ban rahā hai
nazar ne khaa.e haiñ itne dhoke ki dekh kar bhī yaqīñ nahīñ hai

ye vahm thā mirā yā phir havā kā jhoñkā thā
thā mahv-e-ḳhvāb uThāyā balā kā jhoñkā thā

ye vahm dil ko satātā hai rū-ba-rū tere
ye terī diid kahīñ āḳhirī na ban jaa.e

bas ek vahm satātā hai baar baar mujhe
dikhā.ī detā hai patthar ke ār-pār mujhe

ḳhvāb ta.abīr meñ Dhalte haiñ yahāñ se aage
aa nikal jaa.eñ shab-e-vahm-o-gumāñ se aage

vahm-e-nazāra meñ hai āfiyat-e-dīda-o-dil
bhuul kar bhī na kabhī parda-e-asrār uThā

kabhī ḳhud ko chhū kar nahīñ dekhtā huuñ
ḳhudā jaane kis vahm meñ mubtalā huuñ

merā harīf darpai-e-āzār hai mire
mujh ko hadaf banātā hai vahm-o-gumān par

vahm-o-gumāñ ke sahrāoñ meñ phuul khile tirī yādoñ ke
aur charāġhāñ duur tilak hai sāñsoñ kī is vaadī meñ

rishtoñ kī bhīḌ-bhāḌ se vo bhī alag huā
maiñ bhī najāt pā gayā vahm-o-gumān se

havā-e-hijr dikhātī hai sabz bāġh-e-visāl
to bāġh-e-vahm meñ apne mahakne lagtā huuñ

ye vahm fahm-e-haqīqat nahīñ haqīqat hai
ki bas haqīqat-e-duniyā hai giryā-e-shādī

na thā ye vahm-o-gumāñ mujh ko vo bulā.egā
achānak us ne bulāyā to aañkh bhar aa.ī

vahm-o-gumāñ meñ bhī kahāñ ye inqilāb thā
jo kuchh bhī aaj tak nazar aayā vo ḳhvāb thā

pyaar to kar ke nibhā luuñ maiñ qasam se 'ḳhanda'
pyaar gar vahm hai dhoka hai to dhokā hī sahī

ḳhvāb se ḳhvāb meñ ik umr giraftār rahā
ab khalā ḳhvāb ba-juz vahm-o-gumāñ kuchh bhī nahīñ

vajūd vahm mirā ham-safar rahā din bhar
fasīl-e-shām se dekhā to saaya saaya huuñ