Tags-Wajood

faal nek is kā hai urdu ke liye apnā vajūd
jis kā faizān-e-nazar aam hai kyā arz karūñ

vajūd-e-shahr to jañgal meñ Dhal chukā 'ālam'
ab is jagah se mujhe jānib-e-samundar khīñch

magar maiñ ishq meñ parhez se bañdhā huā huuñ
tirā vajūd to ḳhush-zā.eqa banā huā hai

habāb o bahr meñ hājib vajūd hī hai ham aah
mileñ kab us se ye jab tak hijāb rakhte haiñ

mire vajūd kā gumbad hai TūTne vaalā
nikalne vaalā huuñ maiñ is hisār se bāhar

javāñ dinoñ kī havā hai chale chale hī chale
mire vajūd meñ Thahre ki aatī jaatī phire

hujūm-e-nūr meñ khoyā huā hai merā vajūd
sivā-e-rūh vahāñ kyā huuñ maiñ jahāñ tum ho

ayaañ ho aap begāna banāyā
vajūd-e-ḳhāk kā shāna banāyā

jab bhī kisī kī sa.i-e-karam kī havā lage
mujh ko mirā vajūd bikhartā huā lage

gil-e-vajūd se kartā hai kasb-e-kūza-e-jāñ
ḳhumār-e-sūd meñ lekin ziyāñ banātā hai

mujhe saañs saañs girāñ lage, ye vajūd vahm-o-gumāñ lage
maiñ talāsh ḳhud ko karūñ kahāñ mirī zaat ḳhvāb-o-ḳhayāl hai

hai bāb-e-jāñ pe rukā aks-e-mehmāñ aa kar
sar-e-vajūd koī aa.ina talāsh kareñ

agar hai insān kā muqaddar ḳhud apnī miTTī kā rizq honā
to phir zamīñ par ye āsmāñ kā vajūd kis qahr ke liye hai

ye abr-e-āgahī jo barastā rahā yūñhī
miTTī kā ye vajūd mirā ghul na jā.egā

Dahā khaḌā hai hazāroñ jagah se qasr-e-vajūd
batā.ūñ kaun sī us kī maiñ ustuvār taraf

jis se mire vajūd ke pahlū ayaañ hue
shāyad mirā mo.āmla us ke hunar se hai

kis adam kī aur hai is vajūd kā safar
aaj ḳhud ko soch kar dil bahut udaas hai

kahīñ pata na lagā phir vajūd kā mere
uThā ke le ga.ī duniyā shikār kis kā thā

mirā vajūd kitāboñ meñ harf harf huā
ḳhudā kare mirī āvāz ban ke aa.e vo

yahī nahīñ ki maiñ nā-mutma.in huuñ duniyā se
mirā vajūd bhī ik mas.ala rahā hai mujhe