Tags-Waqt

kahīñ mil sakeñ to sameT lā mare roz o shab kī kahāniyāñ
jo ġhubār-e-vaqt meñ chhup ga.iiñ vo hikāyateñ mujhe chāhiyeñ

vo apnī zaat meñ ik chāñd hai pa vaqt-e-sahar
maiñ apnī zaat meñ jugnū huuñ par añdhere meñ

insān kā raushan mustaqbil jis vaqt charāġh-e-rāh banā
har manzil apne qadmoñ se tārīḳh kā naata joḌ ga.ī

ai vaqt ke andhe rakhvālo ye raaz to ham bhī jānte haiñ
be-vaj.h tumhārī āñkhoñ se kyuuñ bīnā.ī muñh moḌ ga.ī

vo nahīñ vaqt ab ki har yak meñ
dekhte the jidhar-tidhar iḳhlās

unheñ to vaqt kī gardish asiir kar bhī chukī
vo ab guzishta zamāne kā ḳhvāb dekhte haiñ

yahī nahīñ ki sar-e-shab qayāmateñ TūTīñ
sahar ke vaqt bhī in bastiyoñ meñ kyā na huā

na jaane log Thaharte haiñ vaqt-e-shām kahāñ
hameñ to ghar meñ bhī rukne kā hauslā na huā

us vaqt bhī zohd-o-taqva par qaa.em rah jā.ūñ tab kahnā
jis vaqt mujhe mai-noshī ke asbāb farāham ho jaa.eñ

baiThā nahīñ huuñ sāya-e-dīvār dekh kar
Thahrā huā huuñ vaqt kī raftār dekh kar

vaqt ke saath guzar jaatā hai har ik sadma
vaqt har zaḳhm ko har ġham ko miTā detā hai

yuuñ huā huuñ jazb 'ja.afar' vaqt ke tūfān meñ
tah maiñ gahre pāniyoñ kī jis tarah kañkar gire

log tharrā ga.e jis vaqt munādī aa.ī
aaj paiġhām nayā zill-e-ilāhī deñge

hisār-e-vaqt meñ apnā vajūd hai mahbūs
asīrī ab rah-e-zindāñ kā ruḳh nahīñ kartī

sahl ho jaatī haiñ is se vaqt kī bārīkiyāñ
duur kartī hai ye sab ke zehn kī tārīkiyāñ

hai vaqt mehrbāñ to kare shād-kām dil
ye dūriyoñ ke zaḳhm bhulā.e to baat hai

haif hai sub.h-e-vatan se na huā vārid-e-vaqt
hech gaahe ba-sar-e-shām-e-ġharībāñ kāġhaz

fursat kā vaqt DhūñDh ke milnā kabhī ajal
tujh ko bhī kaam hai abhī mujh ko bhī kaam hai

na paayā vaqt ai zāhid koī maiñ ne ibādat kā
shab-e-hijrāñ huī āḳhir to sub.h-e-intizār aa.ī

kuchh yuuñ lagtā hai tire saath hī guzrā vo bhī
ham ne jo vaqt tire saath guzārā hī nahīñ