Tags-Waqt

maiñ ek shab kitnī rāteñ jaagā vo maah biite ki saal guzre
pahāḌ sā vaqt kāTtā huuñ shumār kartā huuñ sā.atoñ meñ

tum mujh ko pilāte to ho mai siina pe chaḌh kar
us vaqt agar koī chalā aa.e to kyā ho

vaqt kī sīḌhiyāñ chaḌhte dekhā use
vo gayā phir kidhar maiñ ne dekhā nahīñ

sail-e-zamāñ meñ Duub ga.e mash.hūr-e-zamāna log
vaqt ke munsif ne kab rakkhā qaa.em un kā naam

zindagī vaqt ke pheroñ meñ guzar jaatī hai
maut chupke se dabe paañv chalī jaatī hai

chāhiye gar zindagānī kā maza
vaqt kī lahroñ meñ bahnā chhoḌ do

lamha guzar gayā hai ki arsa guzar gayā
hai kaun vo jo vaqt kī sāzish ye kar gayā

har naqsh ko miTā ke guzartī rahī havā
lauh-e-jahāñ pe vaqt kī tahrīr kuchh bhī ho

vaqt har gaam pe ik zaḳhm nayā detā hai
aur shā.ir se jahāñ zamzama-ḳhvānī māñge

aaj phir vaqt koī apnī nishānī māñge
baat bhūlī huī zaḳhmoñ kī zabānī māñge

har vaqt mire sāmne ik jalvagarī hai
maiñ dekh na pā.ūñ to mirī kam nazarī hai

zindagī dekh lī maiñ ne tirī duniyā ki jahāñ
vaqt ne chhīn liye ḳhvāb suhāne mere

dil meñ har vaqt chubhan rahtī thī
thī mujhe kis kī talab yaad nahīñ

'ehsān' apne vaqt pe maut aa.egī magar
jiine kā mashvara nahīñ detī fazā mujhe

ye bartāo kyā haiñ ye atvār kyā haiñ zarā aap socheñ zarā aap samjheñ
hamīñ par kisī roz chashm-e-ināyat hamīñ se kisī vaqt be-e'tinā.ī

haqīqat ne chakkar meñ Daalā thā ham ko tarīqat bure vaqt par kaam aa.ī
hama-dast kā mas.ala jab hai aage to kaisī duī aur kaisī judā.ī

shikasta-dil kī ḳhushī dosto ḳhushī to na thī
hañsī pe vaqt ke ik tanz thā hañsī to na thī

ab to do vaqt kī roTī bhī nahīñ miltī hai
zindagī kaise kaTegī mirī mahñgā.ī meñ

ḳhvāb jiine nahīñ deñge tujhe ḳhvāboñ se nikal
vaqt barbād na kar rā.egāñ sochoñ se nikal

uḌaan vaalo uḌānoñ pe vaqt bhārī hai
paroñ kī ab ke nahīñ hausloñ kī baarī hai