Tags-Waqt

paḌ jaa.e agar vaqt to is daur meñ koī
parbat to baḌī baat hai raa.ī nahīñ detā

rok letā hai abad vaqt ke us paar kī raah
dūsrī samt se jā.ūñ to azal paḌtā hai

jo uglā vaqt ke ātish-fishāñ ne
vo lamha ḳhaak meñ phir rul rahā thā

tāḳhīr-e-vaqt-e-dīd tirī barhamī kā Dar
kitnā hasīn Dar thā vo Dar kaun le gayā

ravish-e-vaqt se māyūs na hoñ ahl-e-nazar
sāneha qismat-e-arbāb-e-vafā hotā hai

bigḌe hue haiñ zid pe haiñ kaun un se kyā kahe
is vaqt baat baat ke daftar banā.eñge

vaqt bhī tevar badaltā jā.egā
dil bhī apnī chaal chaltā jā.egā

gum-shuda vaqt ke musāfir ko
phir se paane kī justujū kī hai

vaqt kā raaz jānñe se miyāñ
jaane ye kaun roktā hai mujhe

haa.e vo vaqt ki jab be-piye mad-hoshī thī
haa.e ye vaqt ki ab pī ke bhī maḳhmūr nahīñ

vaqt-e-ruḳhsat mujhe qadmoñ meñ machal jaane do
ye tamannā to mire dil kī nikal jaane do

ab aate lamhoñ ke āsār ye batāte haiñ
jo vaqt biit gayā us ko hādsa likkhūñ

kis kaḌe vaqt meñ mausam ne gavāhī māñgī
jab garebān hī apnā hai na dāman apnā

duniyā hai ki gosha-e-jahannam
har vaqt azāb-e-ilāhī tauba

maiñ tire saath rah gayā huuñ kahīñ
vaqt Thahrā huā nahīñ maiñ huuñ

bigāḌnā sañvārnā hai vaqt ke mizāj par
jo Thokaroñ meñ thā vo ab gale kā haar ho gayā

dil diyā tū ne 'muhib' ab ḳhauf hai kis chiiz kā
do-do bāteñ zehn se jis vaqt karne se na Dar

raftār-e-zamāna kā lahja saffāk dikhā.ī detā hai
bar-vaqt koī tadbīr karo āfāt kī niyyat Thiik nahīñ

kal qat.a ta.alluq kar lenā is vaqt to duniyā merī hai
ye raat kī qasmeñ jhūTī haiñ ye raat kī niyyat Thiik nahīñ

vaqt kī qaid se āzād karāne aa.e
āḳhirī vaqt mujhe muñh hī dikhāne aa.e