Tags-Waqt

bahut din vaqt kī hañgāma-ārā.ī meñ guzre haiñ
inheñ guzre hue ayyām kā hāsil hai tanhā.ī

lauTte vaqt vo māñgegā ḳhushī se ruḳhsat
aur ham rote hue us se lipaT jā.eñge

āḳhirī vaqt tirī raah se haT jā.eñge
tū agar ho gayā raazī to palaT jā.eñge

Thahar Thahar kar kauñd rahī thī bijlī bāhar jañgal meñ
train rukī to sarpaT ho gayā ghoḌā vaqt kī tāzish kā

aane vaalā vaqt bhī ro.egā mere vāste
aane vaale mausamoñ ko yaad merī aa.egī

phuul hairat se hameñ dekhā kiye vaqt-e-visāl
gul-badan ke saath 'āzar' gulistāñ kī sair kī

rishtoñ par ik aisā vaqt bhī aatā hai
suljhā suljhā kar uljhā.e jaate haiñ

aḳhtaruzzamāñ nāsir
vaqt jaise royā ho

tū baat nahīñ suntā yahī hal hai phir is kā
jhagḌe ke liye vaqt nikāleñ koī ham bhī

jo ho sake to ḳhud ashkoñ ko poñchh lo 'ibrat'
kisī ke paas kahāñ vaqt dil-dahī ke liye

kyā chāhtā thā vaqt pe likhnā na pūchhiye
hurmat qalam kī apnī bachānī paḌī mujhe

vaqt kī tarah tire haath se nikle hue haiñ
ham sitāre haiñ magar raat se nikle hue haiñ

DhūñDā na pā.iye jo is vaqt meñ sau zar hai
phir chaah jis kī mutlaq hai hī nahīñ hunar hai

ab bhī phirtī hai koī parchhā.īñ
raat ke vaqt bhare jañgal meñ

miTā sā harf huuñ bigḌī huī sī baat huuñ maiñ
jabīn-e-vaqt pe ik naqsh-e-be-sabāt huuñ maiñ

mumkin hai ab vaqt kī chādar par maiñ karūñ rafū kā kaam
juute maiñ ne gāñTh liye haiñ gudḌī maiñ ne sī lī hai

dhuup bhī tez hai 'shabnam' kā bharosā bhī nahīñ
vaqt bhī baaqī nahīñ ab to munājātoñ kā

ai mehrbāñ ajal mujhe kuchh vaqt chāhiye
jab jī bharā to tum ko ishāra karūñgā maiñ

vaqt-e-pīrī dostoñ kī be-ruḳhī kā kyā gilā
bach ke chalte haiñ sabhī girtī huī dīvār se