Tags-Waqt

maiñ bhī taqdīr ke likkhe pe yaqīñ le aatā
vaqt ik baar jo us se mujhe milvā saktā

likhe the naam apne jin pe ham ne daraḳht saare vo kaT chuke haiñ
miTā diyā vaqt ne jinheñ vo ibārateñ kyā shumār karnā

vaqt vo rañg dikhātā hai ki ahl-e-dil bhī
tāq-e-nisyāñ pe suḳhan yaar ke rakh dete haiñ

mile jo vaqt to 'anjum' ba-sūrat-e-dīvān
murattab apnī riyāzat kā goshvāra kareñ

ḳhurshīd pe jis vaqt zavāl aatā hai
kyuuñ zer-e-zamīñ chhup ke chalā jaatā hai

vaqt ke panchhī ko uḌnā thā bil-āḳhir uḌ gayā
āḌī-tirchhī kuchh lakīreñ haiñ faqat ab haath meñ

vaqt ke saath zindagī kā dukh
mire sar par hai har ḳhushī kā dukh

ḳhaak hotā hai balki jal us vaqt
mujh ko ḳhalvat meñ jab bulātā hai

na jaane vaqt ne kyuuñ fāsle ye de diye varna
tumhī to mere jaise the tumheñ to merā honā thā

maiñ pairahan apne maiñ samātā nahīñ juuñ gul
jis vaqt se āmāda pa.e-jāma-darī huuñ

kaTā kar sar bhī martā hī nahīñ vaqt
havā ke haath meñ talvār kyā hai

badalte vaqt kī raftār kyā hai
mohabbat ab tirā kirdār kyā hai

sā.ateñ sar-nigūñ guzartī haiñ
vaqt is ke ḳhayāl meñ khoyā

Dūbte vaqt samundar meñ mire haath lage
vo javāhir jo sar-e-āb nahīñ aate haiñ

qubūliyat kā sabab ek ye bhī ho shāyad
duā ke vaqt meñ āñkhoñ ko nam kiyā jaa.e

hai aisā vaqt ki ḳhud par karam kiyā jaa.e
zarūratoñ ko zarā apnī kam kiyā jaa.e

rañg-e-rukHsār pe itrāo nahīñ
jaane kab vaqt uḌā kar le jaa.e

ā.īne meñ vaqt ke ai ham-nafas
dostoñ kī shakl pahchānī ga.ī

chup-chāp hāl-e-ahl-e-nazar dekhte raho
hai kis ke paas vaqt savāl-o-javāb kā

kis hinā-hāth se āñgan hai mo.attar itnā
vaqt-e-ḳhush sā.at-e-bedār kahāñ se aa.ī