Tags-Waqt

gul ko ma.alūm na thī hasti-e-fānī apnī
ai nasīm-e-saharī vaqt-e-shaguftan samjhā

maiñ apne hāl-o-māzī par bhī kuchh ai 'arsh' ro letā
magar pesh-e-nazar is vaqt mustaqbil kī bāteñ haiñ

falak pe ghor ghaTā.eñ sarāb hone lagīñ
saroñ pe dhuup kā jis vaqt sā.ebān khulā

Thaharnā tak nahīñ sīkhā abhī tak
azal se vaqt zaa.e kar rahā huuñ

vaqt guzar jaatā hai lekin dil kī ranjish
dil meñ baiThī kī baiThī hī rah jaatī hai

sarsar-e-vaqt uḌā le ga.ī rūdād-e-hayāt
vahī aurāq jinheñ ahd-e-javānī kah lo

na brij TuuTe na aañkh jhapkī na vaqt biitā
na jaane kyā kuchh bisarnā thā kyā bisārnā thā

vaqt-e-āḳhir na mulāqāt mirī us se huī
har ġhazal meñ mirī ye nauha sunā.ī degā

vaqt ke saare chakkar haiñ ye 'ālam'-jī varna
yahāñ kisī ko koī nazar-andāz nahīñ kartā

yahāñ mazāfāt meñ is vaqt
Thiik is vaqt

vaqt ke dāman meñ koī
apnī ek kahānī rakh

vaqt detā hai jo pahchān to ye dekhtā hai
kis ne kis dard meñ dil kī ḳhushī rakkhī huī hai

ai yaado tum aise kyuuñ is vaqt kahāñ aa.iiñ
kisī munāsib vaqt na.e hālāt meñ aanā thā

kaisī had-e-jabr hai ye jis par
be-vaqt azaan de rahā huuñ

jazboñ ko zabān de rahā huuñ
maiñ vaqt ko daan de rahā huuñ

vaqt-e-ruḳhsat palaT ke barsī jo
hai nigāhoñ meñ vo nazar baaqī

mohabbat meñ ik aisā vaqt bhī aatā hai insāñ par
sitāroñ kī chamak se choT lagtī hai rag-e-jāñ par

ye tumhārī in dinoñ dostāñ mizha jis ke ġham meñ hai ḳhūñ-chakāñ
vahī āfat-e-dil-e-āshiqāñ kaso vaqt ham se bhī yaar thā

laḌte na kisī tarah se us se kabhī hargiz
par kyā karūñ us vaqt maiñ lāchār ho kī bahs

kyā yaqīñ aur kyā gumāñ chup rah
shaam kā vaqt hai miyāñ chup rah