Tags-Waqt

raat kī baat thī phir sahar ho ga.ī vaqt chaltā rahā dopahar ho ga.ī
shaam aane ko hai raat chhāne ko hai bikhre sapne uThā tū use bhuul jā

ishq meñ ek baḌā zulm hai sābit-qadamī
vaqt ne bhī hameñ is baab meñ qudrat nahīñ dī

gher rakkhā hai use vaqt ke fir.aunoñ ne
raah paanī meñ banā de vo asā māñgtā hai

ḳhudā pe jab se burā vaqt aa gayā 'qaisar'
hubal ke lab pe hai naġhma manāt raqs meñ hai

ārām ke the sāthī kyā kyā jab vaqt paḌā to koī nahīñ
sab dost haiñ apne matlab ke duniyā meñ kisī kā koī nahīñ

misāl-e-vaqt meñ tasvīr-e-sub.h-o-shām huuñ ab
mire vajūd pe chhā.ī hai shab tumhārī tarah

an-ginat rañgoñ ke par bikhre paḌe haiñ har taraf
vaqt kā ghāyal parinda phir se jaulānī meñ hai

uḌte uḌte gir paḌte haiñ aag ke beach
shaam ke vaqt hamāre par ruk jaate haiñ

mere haath se sirf nahīñ ghaḌiyāl girā
kitne vaqt ḳhasāre par ruk jaate haiñ

inqalāb aa.e to phir himmat-e-mardāñ kī qasam
vaqt kī vaqt ke ahkām se bāteñ hoñgī

yahāñ vahāñ se kināre mujhe bulāte rahe
magar maiñ vaqt kā dariyā thā aur bahāv meñ thā

saare teachers bhī rahte haiñ ba-har-hāl ḳhafā
maiñ kisī vaqt unheñ ḳhush hī nahīñ kar paatā

ye ḳhud-sar vaqt le jaa.e kahānī ko kahāñ jaane
musannif kā kisī kirdār meñ honā zarūrī hai

isī ḳhayāl meñ jis vaqt niiñd aatī hai
mire lahū meñ mirī saañs meñ mire dil meñ

us ke aañsū hī batāte the na ab lauTegā vo
is se pahle to bichhaḌte vaqt yuuñ rotā na thā

ye sā.atoñ kī bhiiḌ ne use gañvā diyā na ho
rakhā thā maiñ ne ek lams vaqt kī darār meñ

maiñ jab kabhī us se pūchhtā huuñ ki yaar marham kahāñ hai merā
to vaqt kahtā hai muskurā kar janāb tayyār ho rahā hai

vaqt kī qabr meñ ulfat kā bharam rakhne ko
apnī hī laash utārī hai tumheñ kyā ma.alūm

tum abhī aa.e ho tum baañT lo chāhat ke varaq
vaqt ke saath ḳhayālāt badal jaate haiñ

ham pe vo vaqt hai ab chāhe ḳhushī aa.e ki ġham
aañkh nam hotī hai jazbāt badal jaate haiñ