Tags-Waqt

koī sailāb umaDtā thā ghaḌī se har din
vaqt kī shakl meñ ham ne to guzārā paanī

har vaqt mahv-e-raqs hai chehra ḳhayāl meñ
be-rabt zindagī hai magar dil magan to hai

dil ne phir vaqt se laḌnā chāhā
phir vahī dard-bharī yaad aa.ī

ilāhī dard ke qisse bahut haiñ vaqt thoḌā hai
shab-e-furqat kā dāman bāñdh de dāmān-e-mahshar meñ

magar vo raat bhī sho.aloñ meñ Duub jā.egī
ye vaqt tum pe qayāmat se kam nahīñ hogā

iḳhlās dil se chāhiye sajda namāz meñ
be-fā.eda hai varna jo yuuñ vaqt khoiye

vaqt be-mehr hai is fursat-e-kamyāb meñ tum
merī āñkhoñ meñ raho ḳhvāb-e-mujassam kī tarah

kis ko mehrbāñ kahiye kaun mehrbāñ apnā
vaqt kī ye bāteñ haiñ vaqt ab kahāñ apnā

vaqt ne saare bharosoñ ke shajar kaaT diye
ab to saaya bhī koī ḳhāk-nashīñ kā na rahā

ḳhud-baḳhud hal ho ga.e kitne savāl
vaqt ke ḳhāmosh afsāne ke saath

ajab kuchh ishq kī ḳhush-tar hai vaadī
ki jis vaadī meñ hai har vaqt shādī

uff vo tabassum halkā halkā haa.e vo bhīgī bhīgī palkeñ
vaqt-e-ruḳhsat un pe garāñ thā lamha-e-ruḳhsat ham se ziyāda

vaqt aane pe har ik shaḳhs daġhā detā hai
aisā lagtā hai qayāmat kī ghaḌī hai yaaro

ham to us vaqt samajhte haiñ ki aatī hai bahār
dasht se jab koī jhankār sī aa jaatī hai

mujh pe guzrā hai vaqt-e-hijr-o-visāl
dil ne dekhe haiñ zer-o-bam donoñ

isī ḳhayāl se dil meñ mire ujālā hai
dimāġh vaqt kī dhaḌkan ko sunñe vaalā hai

hayāt-e-rā.egāñ hai aur maiñ huuñ
ye vaqt-e-imtihāñ hai aur maiñ huuñ

vaqt ke jalte hue sūraj kī taptī dhuup meñ
is kī yādoñ ke shajar haiñ sā.ebānī ke liye

talḳhiyoñ se vaqt kī jo ho ga.e nashtar-sifat
lab the vo mash.hūr apnī ḳhush-bayānī ke liye

dil ko har-vaqt jo rahtī hai butoñ kī tasbīh
apne nāloñ ko samajhtā huuñ kī takbīreñ haiñ