Tags-Waqt

zaḳhm taaza hai to dil dukhtā hai
vaqt ke saath ye bhar jā.egā

us pe kyā guzregī vaqt marg andāza lagā
muntashir hastī kā apnī jis ko shīrāza lagā

yazīd-e-vaqt ne ab ke lagā.ī hai qadġhan
ki bhuul kar bhī na gaa.e koī tarāna-e-ishq

dostī kis se na thī kis se mujhe pyaar na thā
jab bure vaqt pe dekhā to koī yaar na thā

shikasta lamhoñ kā tū vaqt ko hisāb na de
havā ke haath meñ bikhrī huī kitāb na de

dekh ḳhūbāñ kuuñ vaqt milne ke
kis adā suuñ salām karte haiñ

rābta laakh sahī qāfila-sālār ke saath
ham ko chalnā hai magar vaqt kī raftār ke saath

mohabbat meñ ik aisā vaqt bhī dil par guzartā hai
ki aañsū ḳhushk ho jaate haiñ tuġhyānī nahīñ jaatī

pattoñ ko chhoḌ detā hai aksar ḳhizāñ ke vaqt
ḳhud-ġharzī hī kuchh aisī yahāñ har shajar meñ hai

chāñd us vaqt bhī to hotā hai
jab kisī ghar meñ shab nahīñ hotī

mushta.il tā-ba-falak ātish-e-pur-dūd huī
mal ke jis vaqt misī tum ne chabāyā biiḌā

vaqt par maut kī lazzat bhī nahīñ de paayā
mujh ko vo aadmī hiirā hī lagā thā pahle

ḳhā.if na ho kyuuñ har fard bashar ma.alūm nahīñ kyā honā hai
hai vaqt ke hāthoñ meñ hunter ma.alūm nahīñ kyā honā hai

vaqt jab karvaTeñ badaltā hai
fitna-e-hashr saath chaltā hai

sitam to ye hai vo farhād-e-vaqt hai jis ne
na jū-e-shīr nikālī na but-tarāsh huā

kaT jaa.e vo zabāñ na ho jis se duā-e-ḳhair
phūTe vo aañkh jo ki na vaqt-e-sahar khule

pūchh to luuñ rāhzan-e-vaqt se
merī kalā yā mirā sar chāhiye

us vaqt mujh ko dāvat-e-jām-o-subū milī
jis vaqt maiñ gunāh ke qābil nahīñ rahā

kab se kāñdhoñ pe uThā.e hue hairāñ hairāñ
vaqt kā bār-e-garāñ

fazā hai nuur kī bārish se sīm-gūñ is vaqt
jahān-e-mast pe taarī hai ik sakūñ is vaqt