Tags-Waqt

vaqt phailātā hai dāman apnā
aag kā dariyā ravāñ hotā hai

paḌā thā raah meñ jo sañg-e-mīl se aage
vo apne vaqt kā 'farhat' nahīñ ġhazālī thā

vaqt aane pe sar apnā kaTā dete haiñ 'rahbar'
ham ko nahīñ mālūm ki hai hubb-e-vatan kyā

hākim-e-vaqt hai ab ḳhud hī madad-gār-e-sitam
us se zulmoñ kī shikāyat bhī nahīñ kar sakte

yuuñ to kabhī muñh pher ke dekho bhī nahīñ ho
jab vaqt paḌe hai to mudārāt karo ho

ye vaqt abhī tham jā.egā māhaul meñ dil ram jā.egā
bas aap yūñhī baiThe rahiye ye raat suhānī kaam kī hai

jab tujhe merī chaah thī jānāñ
bas vahī vaqt thā kaḌā merā

huā hai jin ke karam se dil o nazar kā ziyāñ
ba-faiz-e-vaqt mire ġham-gusār vo bhī haiñ

yaad rakhnā kabhī na bachiyegā
mil ga.e aap vaqt gar shab ke

kārzār-e-zindagī meñ aise lamhe aa ga.e
azm-e-mohkam rakhne vaale vaqt se ghabrā ga.e

un kā zikr un kī tamannā un kī yaad
vaqt kitnā qīmtī hai aaj kal

aur kuchh tujh se nahīñ māñgtā ai jān-e-hayāt
vaqt bas mere liye apnā har ik pal kar de

kis tarah vaqt guzartā hai pata hī na chale
ibtidā aaj se kar aur use kal kar de

tire dukh meñ hamāre baal chāñdī ho ga.e haiñ
aur is chāñdī ne qabl az vaqt būḌhā kar diyā hai

un ke ruḳhsat kā vo lamha mujhe yuuñ lagtā hai
vaqt nārāz huā din bhī Dhalā ho jaise

saaqī hai yār-e-māh-liqā hai sharāb hai
ab bādshāh-e-vaqt haiñ apne makāñ meñ ham

ab ashk to kahāñ hai jo chāhūñ Tapak paḌe
āñkhoñ se vaqt-e-girya magar ḳhuuñ Tapak paḌe

ai zāhid-e-ḳhud-bīñ rahmat-e-haq āġhosh meñ us ko le legī
jo apne gunāhoñ par dil meñ har-vaqt pashemāñ hotā hai

har-vaqt ulajhte rahte haiñ ye haath kisī ke dāman se
jab hosh mujhe aa jaatā hai merā hī garebāñ hotā hai