Tags-Waqt

chalo na ishq hī jiitā na aql haar sakī
tamām vaqt maze kā muqābla to rahā

na.ī duniyā ke sundar ban ke andar
purāne vaqt ke paude bahut haiñ

jab merā ghar bahisht sī gul-vādiyoñ meñ thā
us vaqt maiñ ghirā huā shahzādiyoñ meñ thā

arsa-e-umr mile vus.at-e-vīrāñ meñ mujhe
vaqt le aayā hai phir shorish-e-tūfāñ meñ mujhe

utarte vaqt paanī meñ zarā ye dekh lenā thā
ki andar beach meñ jā kar yahī dariyā badaltā hai

tujhe āgahī kī nahīñ ḳhabar mirī gumrahī pe na tanz kar
are vaqt vaqt kī baat hai yahī aib rashk-e-hunar bhī hai

aamad principal kī hai hoshyār laḌkiyo
ye vaqt hai shaguftan-e-gul-hā-e-nāz kā

ban jaate haiñ lamhe bhī kitne sañgīn
vaqt kabhī jab apnā bojh nahīñ Dhotā

ek sadā ke lams meñ vaqt ke chāroñ khoñT bhigo leñ
guuñj meñ lipTe yaad ke kohna rastoñ par phir ho leñ

Dar ḳhudā siiñ ḳhuub na.iiñ ye vaqt-e-qatl-e-ām kuuñ
sub.h kuuñ kholā na kar is zulf-e-ḳhūn-āshām kuuñ

aḳhīr vaqt hai 'āsī' chalo madīne ko
nisār ho ke maro turbat-e-payambar par

vaqt mohlat na degā phir tum ko
tiir jis dam kamān se niklā

vaqt tab tak thā to sajda masjidoñ meñ kufr thā
fā.eda ab jab ki qad mehrāb sā ḳham ho gayā

dil hai na nishān be-dilī kā
kyā vaqt paḌā hai be-kasī kā

vaqt kam hai na chheḌ hijr kī baat
ye baḌī dāstān hai pyāre

mausam-e-hijr bhī hañs detā hai jis vaqt tirī
yaad ke phuul ḳhayāloñ se sharārat kar deñ

pyaar kā pahlā ḳhat likhne meñ vaqt to lagtā hai
na.e parindoñ ko uḌne meñ vaqt to lagtā hai

ham ne ilāj-e-zaḳhm-e-dil to DhūñD liyā lekin
gahre zaḳhmoñ ko bharne meñ vaqt to lagtā hai

gāñTh agar lag jaa.e to phir rishte hoñ yā Dorī
laakh kareñ koshish khulne meñ vaqt to lagtā hai

jism kī baat nahīñ thī un ke dil tak jaanā thā
lambī duurī tai karne meñ vaqt to lagtā hai