Tags-War

jañg aḳhlāq-o-mohabbat se bhī ho saktī hai
apne dushman pe na talvār uThāo yaaro

maiñ dushmanoñ se agar jañg jiit bhī jā.ūñ
to un kī aurteñ qaidī nahīñ banā.ūñgā

juz kusht-o-ḳhūn be-gunahāñ āstīñ se tū
bāhar nikāltā hai kab ai ḳhāna-jañg dast

tirī sadā pe mujh ko lauTnā thā jañg chhoḌ kar
magar vo ek tiir jo sar-e-kamān aa gayā

kamāñ pe chaḌh ke ba-shakl-e-ḳhadañg honā paḌā
harīf-e-amn se masrūf-e-jañg honā paḌā

jañg meñ kaise Tikeñge vo bhalā hastī kī
jo kisī shāḳh ko shamshīr nahīñ kar sakte

khet rul jā.eñge pāgal-pan meñ
jañg kaisī mujhe haarā samjho

vo jañg jis meñ muqābil rahe zamīr mirā
mujhe vo jiit bhī 'amabar' na hogī haar se kam

har ghar sulag rahā thā ajab sard aag meñ
jab arsa-gāh-e-jañg se lashkar palaT kar aa.e

shikasta-ḳhvāb-o-shikasta-pā huuñ mujhe duāoñ meñ yaad rakhnā
maiñ āḳhirī jañg laḌ rahā huuñ mujhe duāoñ meñ yaad rakhnā

jañg hai jurm mohabbat hai ḳhilāf-e-tahzīb
ho chukā valvala-e-ahd-e-javānī paidā

jo jañg ke maidāñ ko ik khel samajhtā thā
haare hue lashkar ko dekhā to bahut royā

kahīñ raushan nazar aate nahīñ ab sar ke charāġh
arsa-e-jañg se vo ḳhud ko kahāñ le jaa.e

āḳhir ḳhud apne hī lahū meñ Duub ke sarf-e-viġhā hoge
qadam qadam par jañg laḌī hai kahāñ kahāñ barpā hoge

sunā hai kal tak the vo paḌosī baḌā thā aapas meñ bhā.ī-chāra
vahī paḌosī to ab bhī haiñ vo magar hai aapas meñ jañg kaisī

jañg meñ jā.egā ab merā hī sar jaan gayā
aur hogā na koī sīna-sipar jaan gayā

aaj talvār huī jaatī haiñ shāḳheñ us kī
jañg honī hai havāoñ se shajar jaan gayā

koī batā.e ye us ke ġhurūr-e-bejā ko
vo jañg maiñ ne laḌī hī nahīñ jo haarī hai

maiñ qatra ho ke bhī tūfāñ se jañg letā huuñ
mujhe bachānā samundar kī zimmedārī hai

ye hai to sab ke liye ho ye zid hamārī hai
is ek baat pe duniyā se jañg jaarī hai