Tags-War

kuchh chalī to tere āshiq se hī talvār chalī
jab huī jañg bapā mard-e-viġhā maiñ hī huā

kyā ḳhush-nasībī hai mirī maiñ ek tanhā fauj huuñ
jhuuT aur sach kī jañg meñ kaam aa gayā lashkar mirā

parchhā.iyoñ kī jañg thī ḳhuuñ kā dariyā
ham-zād rajaz-ḳhvāñ huā aisā na kabhī

hameñ tabāh to honā thā apnī apnī jagah!
tavīl jañg thī aur jañg bhī anā kī thī

us zulm kā qissa lambā hai us jañg kī pustak bhārī hai
vo jañg jo kab kī ḳhatm huī vo jañg abhī tak jaarī hai

phir jañg huī vo jañg jise tā-hashr na bhūlegā koī
vo zulm hue jin par ab tak har shahr meñ mātam hote haiñ

dimāġh-o-zehn meñ ik jañg barpā hai ḳhayāloñ kī
ise hamvār kar ke ik sukūn-e-jāvedāñ de de

us kī jañg-e-be-sabab kā hai taġhāful hī ilaaj
aap Dhelā ho ke āvegā idhar Dhal Dhal ke Dhul

laakh lashkar aa.eñ kab hilte haiñ ham
āñdhiyoñ meñ jañg kī khilte haiñ ham

bikhertī hai shab mujhe sameT letī hai sahar
maiñ chāhtā huuñ ḳhatm ho ye jañg baar baar kī

jañg to ḳhud hī ek mas.ala hai
jañg kyā mas.aloñ kā hal degī

mujh be-gunah ke qatl kā āhañg kab talak
aa ab binā-e-sulh rakheñ jañg kab talak

maiñ ḳhālī maidān-e-jañg
haath us ke talvār mirī

ham jo talvār uThā leñ to qayāmat aa jaa.e
haañ magar ye ki hameñ jañg se Dar lagtā hai

ik baḌī jañg laḌ rahā huuñ maiñ
hañs ke tujh se bichhaḌ rahā huuñ maiñ

ye kaisī jañg hai shahroñ kī tañg galiyāñ bhī
bhaḌakte sho.aloñ se raushan dikhā.ī detī haiñ

ye kaisī jañg hai jis meñ bamoñ kī yūrish se
samā.ateñ bhī ḳhudā kī panāh chāhtī haiñ

ye kaisī jañg hai jis meñ asiir logoñ par
aziyyatoñ ke liye kutte chhoḌe jaate haiñ

ye kaisī jañg hai jis meñ muqāble ke baġhair
nishāna saadh ke golī chalā.ī jaatī hai

ye kaisī jañg hai jo apnī manfa.at ke liye
ġharīb mulkoñ kī āzādiyoñ ko chhīntī hai