Tags-War

jañg-e-vatan meñ sidq ke hathiyār kā hai kaam
darkār is meñ aslaha-e-āhīñ nahīñ

ham bhī is jañg meñ filhāl kiye lete haiñ sulh
dekhā jā.egā jo hālāt ne añgḌā.ī lī

shauharoñ se bībayāñ laḌtī haiñ chhāpa-mār jañg
rābta un kā bhī kyā kashmīr kī vaadī se hai

is sabab maiñ jañg shāne se karūñ huuñ baar baar
dil huā hai gum mirā us kākul-e-pechāñ ke biich

raste se mirī jañg bhī jaarī hai abhī tak
aur paañv tale zaḳhm kī vahshat bhī vahī hai

ye jañg jiit hai kis kī ye haar kis kī hai
ye faisla mirī TuuTī kamān se hogā

ḳhudā-e-bartar tirī zamīñ par zamīñ kī ḳhātir ye jañg kyuuñ hai
har ek fat.h-o-zafar ke dāman pe ḳhūn-e-insān kā rañg kyuuñ hai

suroñ meñ kibr-o-ġhurūr kyuuñ hai diloñ ke shīshe ye rañg kyuuñ hai
ḳhudā-e-bartar tirī zamīñ par zamīñ kī ḳhātir ye jañg kyuuñ hai

jinheñ talab hai jahān bhar kī unhīñ kā dil itnā tañg kyuuñ hai
ḳhudā-e-bartar terī zamīñ par zamīñ kī ḳhātir ye jañg kyuuñ hai

zamīñ bhī terī hai ham bhī tere ye milkiyat kā savāl kyā hai
ye qatl-o-ḳhūñ kā rivāj kyuuñ hai ye rasm-e-jañg-o-jidāl kyā hai

hai intizār mujhe jañg ḳhatm hone kā
lahū kī qaid se bāhar koī bulātā hai

jañg-e-āzādī meñ ham ne bhī kiyā ḳhud ko nisār
jaan dene ke liye aaj bhī tayyār haiñ ham

aa andalīb sulh kareñ jañg ho chukī
le ai zabāñ-darāz tū sab kuchh sivā.e gul

ajiib us se ta.alluq hai kyā kahā jaa.e
kuchh aisī sulh nahīñ hai kuchh aisī jañg nahīñ

saf-e-azīzāñ saf-e-dushmanāñ bhī merī thī
vo jañg merī thī sūd-o-ziyāñ bhī mere the

maiñ ahl-e-duniyā se masrūf-e-jañg ho jā.ūñ
ki pichhlī raat milā hai mujhe ishāra-e-ḳhvāb

shikāyat kareñ kyā shikāyat se kyā ho
agar jañg lāzim hai to hausla ho

bāñdh kar sar pe kafan kuud paḌe haiñ jis meñ
jañg hai ġhair kī maidān kisī aur kā hai

nek-o-bad meñ jo nahīñ jañg adam meñ to bhalā
kyuuñ gul o ḳhaar baham dast-o-garebāñ nikle

garche maiñ sar se pair talak nok-e-sañg thā
phir bhī vo mujh se bar-sar-e-paikār-o-jañg thā