Tags-Yaad

ab junūñ kī evaz hai yād-e-junūñ
haath meñ hathkaḌī sī rahtī hai

bāġh-e-jahāñ ko yaad kareñge adam meñ kyā
kunj-e-qafas se tañg rahe āshiyāñ meñ ham

parinde lauT ke jab ghar ko jaane lagte haiñ
hameñ bhī yaad dar-o-bām aane lagte haiñ

maiñ tujhe yaad bhī kartā huuñ to jal uThtā huuñ
tū ne kis dard ke sahrā meñ gañvāyā hai mujhe

kisī kī yaad meñ kyā kyā na ham pe biit ga.ī
jahāñ ne dī thī jo fursat zarā hameñ ġham se

ek aañsū girā sochte sochte
yaad kyā aa gayā sochte sochte

kaun thā kyā thā vo yaad aatā nahīñ
yaad aa jā.egā sochte sochte

maiñ un ke sitam sab bhuul gayā mujh ko to karam yaad aate haiñ
vo sar bhī uThā saktā hai kabhī jo banda-e-ehsāñ hotā hai

hisāb-e-roz-e-mahshar se nahīñ kuchh 'barq' ko ḳhatra
jo terī yaad is ke dil meñ bastī hai gurū-nānak

vo mujh se be-ḳhabar haiñ un kī aadat hī kuchh aisī hai
maiñ un ko yaad kartā huuñ mohabbat hī kuchh aisī hai

dil meñ phailī hai yuuñ raushnī yaad kī
jaise vīrān mandir meñ dīpak jale

ek chehra jo mirī āñkhoñ meñ ghar kartā rahā
bas usī chehre ko 'satya' yaad karte rah ga.e

palkoñ pe bikharte haiñ tirī yaad ke motī
har ashk-e-nadāmat tirā andāz-e-karam hai

maiñ us musāfir ko yaad kar ke mutma.in huuñ
jo Dher saarī duā.eñ de ke chalā gayā hai

yaad aayā in āñkhoñ kā paimān-e-vafā jab bhī
sāġhar mire hāthoñ se be-sāḳhta chhūTā hai

jahāñ pe phuul the aur yaad bhī tumhārī thī
usī paḌāv pe ham ne thakan utārī thī

jañg kī bāteñ karne vaalo yaad rahe
bachte haiñ bas aaheñ aañsū naale jī

bhuul jaane ko hai jahāñ saarā
yaad rakhne ko ik ḳhudā hai bahut

ḳhvāb se lipTī hue yaad ke saada lamho
dard ke haath na aane kā bhī sochā jaa.e

aa ga.iiñ yaad phir vahī bāteñ
kal ba-mushkil jinheñ bhulāyā thā