Tags-Yaad

jab bhī uThte haiñ tirī yaad ke sho.ale dil se
khaal bachtī hai maiñ andar se jhulas jaatā huuñ

ek sadā ke lams meñ vaqt ke chāroñ khoñT bhigo leñ
guuñj meñ lipTe yaad ke kohna rastoñ par phir ho leñ

shaam kaisī mire āñgan meñ utar aa.ī hai
yaad hai dil meñ tirī ālam-e-tanhā.ī hai

bhulā.ī nahīñ jā sakeñgī ye bāteñ
tumheñ yaad ā.eñge ham yaad rakhnā

mileñge tumheñ raah meñ but-kade bhī
zarā apne allāh ko yaad rakhnā

koī aa jaatā kabhī yūñhī agar dil ke qarīb
ham tirā zikr pa.e-yād-dahānī karte

farishtoñ kī pahlī baġhāvat kā manzar mujhe yaad aayā
kuchh aisā lagā jaise aadam kā saarā alamiya

yaad terī yaad hai nām-e-ḳhudā
varna ham kyā aur hamārī yaad kyā

ātishīñ naale vo majnūñ ke mujhe aate haiñ yaad
dekhtā huuñ jo kahīñ dahke hai vīrāne meñ aag

shiddat-e-shauq meñ kuchh itnā use yaad kiyā
ā.īna toḌ ke tasvīr nikal aa.ī hai

mausam-e-hijr bhī hañs detā hai jis vaqt tirī
yaad ke phuul ḳhayāloñ se sharārat kar deñ

ai yād-e-yār dekh ki bā-vasf-e-ranj-e-hijr
masrūr haiñ tirī ḳhalish-e-nā-tavāñ se ham

bhuul kar ḳhud ko ḳhudā kī yaad meñ hote haiñ mahv
nāḳhudā ko bhī bhañvar meñ bā-ḳhudā paate haiñ log

kis ko samjhā.eñ ye samjhāne kī bāteñ kab haiñ
vasl kab yaad rahā hijr meñ kyā bhuul ga.e

kam-ayārī ne ḳhudā-soz banāyā aisā
but to sab yaad rahe ek ḳhudā bhuul ga.e

ḳhuub 'sarvar' tumheñ ummīd-e-karam yaad rahī
kyā sitam hai ki gunāhoñ kī sazā bhuul ga.e

jab yaad koī aa jaatī hai yuuñ dil kī kalī khil jaatī hai
jaise ḳhvāboñ kī duniyā meñ bachcha hañs de sote sote

vo mirī rāteñ mirī āñkhoñ meñ aa kar le ga.ī
yaad terī chor thī nīndeñ churā kar le ga.ī

ye ajiib mantiq-e-ishq hai magar is meñ kuchh bhī na ban paḌe
mire dil meñ yaad kisī kī hai mujhe bhūltā koī aur hai