Tags-Yaad

muskurāne kā yahī andāz thā
jab kalī chaTkī to vo yaad aa gayā

vo ma.asūm tanhā pareshāñ sī laḌkī use yaad merī satātī to hogī
nigāhoñ ke bādal baraste jo hoñge vo chhup-chhup ke aañsū bahātī to hogī

kisī kī hasīñ shoḳh āñkhoñ meñ yaaro mirī yaad meñ jhilmilātī to hogī
sahelī ko tasvīr merī dikhā kar vo sharmā ke ḳhud jheñp jaatī to hogī

masjid vahshat meñ paḌhtā hai tarāvīh-e-junūñ
mus.haf husn-e-parī-ruḳhsār jis kuuñ yaad hai

rañg-e-sanam-kada jo zarā yaad aa gayā
TūTīñ vo bijliyāñ ki ḳhudā yaad aa gayā

har-chand dil ko tark-e-mohabbat kā thā ḳhayāl
lekin kisī kā ahd-e-vafā yaad aa gayā

jaise kisī ne chhīn lī rañgīnī-e-bahār
kyā jāniye bahār meñ kyā yaad aa gayā

rahmat nazar bachā ke nikalne ko thī magar
vo irti.āsh-e-dast-e-duā yaad aa gayā

allāh re sitam ki unheñ mujh ko dekh kar
sab kuchh mohabbatoñ ke sivā yaad aa gayā

us huur kī jo gulshan-e-āriz kī yaad thī
dekhā kiyā firāq meñ aalam bahisht kā

khanak uTTheñ na palkoñ par kahīñ jalte hue aañsū
tum itnā yaad mat aao ke sannāTā duhā.ī de

vahīñ kal vaqt ne khaa.ī thī Thokar yaad hai ab tak
vo pech-o-ḳham jahāñ terī galī taqsīm hotī hai

shor itnā huā āñgan meñ ki phir bhuul gayā
aaj barsoñ meñ use yaad kiyā thā maiñ ne

ab ye sochā hai ik shaḳhs kī yaad ko
zindagī kī tarah bhuul jā.eñge ham

ab bhī hai havāoñ meñ ga.e vaqt kī āvāz
mahfūz hai sīnoñ meñ har ik yaad purānī

abhī hai vaqt chalo rābta bahāl kareñ
dilā.eñ yaad use ahd-e-pā.edār kī baat

mere qad ko māpne vaale shāyad tujh ko yaad nahīñ
uñglī par hī uTh jaatā hai kabhī kabhī govardhan bhī

yaad aatā hai musībat maiñ duāoñ kī tarah
shahr ke vīrān ma.abad meñ kahīñ rahtā hai vo

jab yaad kisī kī aatī hai ik barq sī lahrā jaatī hai
jab ham hī dard ke ḳhvāhāñ hoñ phir dard kā darmāñ kaun kare

terī yaad kā har manzar pas-manzar likhtā rahtā huuñ
dil ko varaq banātā huuñ aur shab bhar likhtā rahtā huuñ