Tags-Yaad

ḳhudā ma.alūm kab parda uThegā diid kab hogī
nigāhoñ se jo ojhal hai usī kī yaad aatī hai

jīte-jī qadr bashar kī nahīñ hotī sāhab
yaad aa.egī tumheñ merī vafā mere ba.ad

kabhī to yaad ke gul-dān meñ sajā.ūñ use
kabhī vo sāmne bhī ho to bhuul jā.ūñ use

mohabbat ab nahīñ hogī ye kuchh din ba.ad meñ hogī
guzar jā.eñge jab ye din ye un kī yaad meñ hogī

ashk motī na the bah ga.e bah ga.e hañste hañste ye tum aaj kyā kah ga.e
yaad kar ke vo din ham bhī chup rah ga.e jab in āñkhoñ meñ aañsū gavārā na thā

tumhārī yaad bhī aatī nahīñ ab
na jaane kis kī bahkā.ī huī hai

raqs kartī huī aatī hai tire jism kī yaad
terī TuuTī huī añgḌā.ī ġhazal gaatī hai

maiñ sochtā huuñ magar yaad kuchh nahīñ aatā
ki iḳhtitām kahāñ ḳhvāb ke safar kā huā

baaqī jahāñ meñ qais na farhād rah gayā
afsāna āshiqoñ kā faqat yaad rah gayā

mahshar meñ jā-e-shikva kiyā shukr yaar kā
jo bhūlnā thā mujh ko vahī yaad rah gayā

vo din ga.e ki thī mire siine meñ kuchh ḳharāsh
ab dil kahāñ hai dil kā nishāñ yaad rah gayā

zulmat meñ bahut hī yaad aa.e
vo chāñd jo ham-safar rahe haiñ

ik sāya-e-shām yaad aayā
ḳhushbū kā ḳhirām yaad aayā

dhoyā huā saat pāniyoñ meñ
kyā naam thā naam yaad aayā

lahje meñ shaguftagī guloñ kī
ik shusta kalām yaad aayā

achchhā huā gor tak to pahuñche
yāroñ ko salām yaad aayā

ai mauja-e-bād kyā huā hai
kyā taaza payām yaad aayā

kuchh aur zamīñ meñ gaḌ ga.e ham
jab apnā maqām yaad aayā

maqtal se muḌ aa.e ghar ko 'gauhar'
shāyad koī kaam yaad aayā

dil ābād kahāñ rah paa.e us kī yaad bhulā dene se
kamra vīrāñ ho jaatā hai ik tasvīr haTā dene se