Tags-Yaad

in āñsuoñ se bhalā merā kyā bhalā hogā
vo mere ba.ad jo royā bhī yaad kar ke mujhe

chalī hai ye ḳhushbū tire gesuoñ se
tirī yaad hai terā dāman hai kyā hai

ye lau kaisī hai jo ik saañs bhī maddham nahīñ hotī
bhulāne par bhī zālim yaad us kī kam nahīñ hotī

bhulāyā hai mujhe tū ne tirī barham-mizājī ne
magar bedard terī yaad phir bhī kam nahīñ hotī

vo zamānā bhī tumheñ yaad hai tum kahte the
dost duniyā meñ nahiñ 'dāġh' se behtar apnā

dam liyā thā na qayāmat ne hanūz
phir tirā vaqt-e-safar yaad aayā

'fātima' yaad kis kī aa.ī hai
bhar ga.ī aañkh jhilmilāhaT se

choTī guñdhvā.ī huī yaar ne khulvā Daalī
rahm aayā koī mahbūs-e-rasan yaad aayā

maiñ terī yaad meñ gum thā ki khā gayā Thokar
ye hādsa mirī rāhoñ meñ baar baar huā

abr kā sar pe sā.ebāñ bhī to ho
sohbat yād-e-raftagāñ bhī to ho

shikasta-ḳhvāb-o-shikasta-pā huuñ mujhe duāoñ meñ yaad rakhnā
maiñ āḳhirī jañg laḌ rahā huuñ mujhe duāoñ meñ yaad rakhnā

havā.eñ paiġhām de ga.ī haiñ ki mujh ko dariyā bulā rahā hai
maiñ baat saarī samajh gayā huuñ mujhe duāoñ meñ yaad rakhnā

na jaane kuufe ko kyā ḳhabar ho na jaane kis dasht meñ basar ho
maiñ phir madīne se jā rahā huuñ mujhe duāoñ meñ yaad rakhnā

mujhe azīzān-e-man mohabbat kā koī bhī tajraba nahīñ hai
maiñ is safar meñ nayā nayā huuñ mujhe duāoñ meñ yaad rakhnā

mujhe kis se bhalā.ī kī ab koī tavaqqo.a nahīñ hai 'tābish'
maiñ ādatan sab se kah rahā huuñ mujhe duāoñ meñ yaad rakhnā

yaad rakkho ik na ik din saañp bāhar ā.eñge
āstīnoñ meñ unheñ kab tak chhupāyā jā.egā

kabhī zulfoñ kī ghaTā ne gherā
kabhī āñkhoñ kī chamak yaad aa.ī

apnā dard bhulā deñ ai dil us ke dard kī ḳhātir
apne ghaav yaad na aa.eñ chāñd kā ghaav dekheñ

kabhī ḳhush kar ga.ī mujh ko tirī yaad
kabhī āñkhoñ meñ aañsū aa gayā hai

bahut duur ab hai dil se yaad terī
mohabbat kā zamāna aa rahā hai