Tags-Yaad

be-ḳhudī aur baḌh ga.ī dil kī
jaane kyā yaad aa gayā hogā

apnoñ ne vo rañj diye haiñ begāne yaad aate haiñ
dekh ke us bastī kī hālat vīrāne yaad aate haiñ

us nagrī meñ qadam qadam pe sar ko jhukānā paḌtā hai
us nagrī meñ qadam qadam par but-ḳhāne yaad aate haiñ

āñkheñ pur-nam ho jaatī haiñ ġhurbat ke sahrāoñ meñ
jab us rim-jhim kī vaadī ke afsāne yaad aate haiñ

aise aise dard mile haiñ na.e dayāroñ meñ ham ko
bichhḌe hue kuchh log purāne yārāne yaad aate haiñ

jin ke kāran aaj hamāre haal pe duniyā hastī hai
kitne zālim chehre jaane pahchāne yaad aate haiñ

yuuñ na luTī thī galiyoñ daulat apne ashkoñ kī
rote haiñ to ham ko apne ġham-ḳhāne yaad aate haiñ

koī to parcham le kar nikle apne garebāñ kā 'jālib'
chāroñ jānib sannāTā hai dīvāne yaad aate haiñ

kahāñ milā maiñ tujhe ye savāl ba.ad kā hai
tū pahle yaad to kar kis jagah gañvāyā mujhe

kitne hasīn din the anjān the jahāñ se
aatā hai yaad ab vo guzrā huā zamāna

jise yaad apnī lagā.iye use saaf dil se bhulā.iye
Tuk idhar to aañkh milā.iye yahī ham se qaul-o-qarār thā

kisī kī yaad ne mahkā diyā hai zaḳhm-e-talab
sabā ke haath se maslī huī kalī kī tarah

yaad meñ us ke sāq-e-sīmīñ kī
de de mārūñ huuñ haath rānoñ par

faqīr kis darja shādmāñ the huzūr ko kuchh to yaad hogā
huzūr kis darja mehrbāñ the huzūr ko kuchh to yaad hogā

vo mai-kada thā sanam-kada thā ki bāb-e-jannat khule hue the
tamām shab aap ham kahāñ the huzūr ko kuchh to yaad hogā

vahāñ bahāroñ ke zamzame the vahāñ nigāroñ ke jamgaThe the
vahāñ sitāroñ ke kārvāñ the huzūr ko kuchh to yaad hogā

pahan ke phūloñ ke taaj sar par hasīn-o-shādāb masnadoñ par
subū-ba-kaf kaun hukmarāñ the huzūr ko kuchh to yaad hogā

marāhil-e-rāhat-o-amāñ the masā.il-e-māh-o-kahkashāñ the
mashāġhil-e-harf-o-dāstāñ the huzūr ko kuchh to yaad hogā

agarche shauq-o-talab the be-sāḳhta ham-āġhoshiyoñ pe maa.il
ka.ī takalluf bhī darmiyāñ the huzūr ko kuchh to yaad hogā

latīf shāmeñ tabī.atoñ ke zamīr se ḳhuub āshnā thiiñ
hasīñ savere mizāj-dāñ the huzūr ko kuchh to yaad hogā