Tags-Yaad

rishta-e-jāñ meñ girah paḌ ga.ī uljhan ke sabab
dil ko jab gesū-e-pur-pech-o-shikan yaad aayā

pā ke sar-chashma-e-haivāñ jo phir aayā ulTā
kyā 'sikandar' ko tirā chāh-e-zaqan yaad aayā

miT ga.ī dil ke na hone se vo dāġhoñ kī bahār
ai 'nazar' vaqt-e-ḳhizāñ ham ko chaman yaad aayā

shaam nahīñ Dhaltī kisī sūrat raat nahīñ kaTtī kisī taur
ab to bahut dil ghabrā.e hai ab to bahut yaad aao ho

haiñ ahbāb bhī ik sarmāya lekin ye bhī yaad rahe
utnī hī aañch lagegī 'shaukat' jitnā tez alaav ho

kal kisī ajnabī kā husn mujhe
yaad aayā to yaad aa.e gayā

maiñ use bhuul gayā taaki use yaad na aa.uuñ
kitnā mahbūb mujhe bhūlne vaalā thā mirā

'hayāt' dukhtī huī rag ko kis ne chheḌ diyā
uThī vo Tiis ki yaad aa gayā ḳhudā mujh ko

jab bhī terī yaad aatī hai dil bahlānā paḌtā hai
pahroñ tanhā saḌkoñ par ham gaane gaate phirte haiñ

kuchh aaise bhā ga.e hameñ duniyā ke dard-o-ġham
kū-e-butāñ meñ bhūlī huī yaad ham hue

jo ham ko bhuul ga.e un ko yaad kyuuñ kiije
tamām raat koī chupke chupke kahtā hai

pūchhne vaale ba-zid haiñ ki batāyā jaa.e
rone vāloñ ko nahīñ yaad ki kyuuñ rote haiñ

jī na sakūñ maiñ jis ke baġhair
akasr yaad na aayā vo

'nāsir' sachchā shā.er thā
aaj bahut yaad aayā vo

dimāġh-o-dil kī saarī kashmakash bekār-o-lā-hāsil
nashe kī tarah us kī yaad sab par chhā.ī jaatī hai

dil meñ dar aave hai har sub.h koī yaad aise
juuñ dabe-pāñv nasīm-e-saharī aave hai

baat kuchh yuuñ hai ki kuchh yaad nahīñ hai ham ko
haañ magar raat ko ruḳhsat jo sitāre hue haiñ

vo kisī se tum ko jo rabt thā tumheñ yaad ho ki na yaad ho
vo kisī pe thā koī mubtilā tumheñ yaad ho ki na yaad ho

kabhī ham meñ tum meñ bhī pyaar thā tumheñ yaad ho ki na yaad ho
kabhī ham bhī tum bhī the ek-jā tumheñ yaad ho ki na yaad ho

vo banānā chehra itaab kā vo na denā muñh se javāb kā
vo kisī kī minnat o iltijā tumheñ yaad ho ki na yaad ho