Tags-Yaad

tumheñ jis kī chaah pe naaz thā jo tumhārā mahram-e-rāz thā
maiñ vahī huuñ āshiq-e-bā-vafā tumheñ yaad ho ki na yaad ho

kabhī ham meñ tum meñ bhī saaz the kabhī ham bhī vaqf-e-niyāz the
hameñ yaad thā so jatā diyā tumheñ yaad ho ki na yaad ho

kabhī bolnā vo ḳhafā ḳhafā kabhī baiThnā vo judā judā
vo zamāna naaz o niyāz kā tumheñ yaad ho ki na yaad ho

abhī thoḌe din kā hai tazkira ki raqīb kahte the barmalā
mire aage tum ko burā-bhalā tumheñ yaad ho ki na yaad ho

kabhī hañs ke muñh ko chhupā liyā kabhī muskurā ke dikhā diyā
kabhī shoḳhiyāñ thiiñ kabhī hayā tumheñ yaad ho ki na yaad ho

jo banā hai ārif-e-bā-ḳhudā ye vahī 'zahīr' hai be-hayā
vo jo rind-e-ḳhāna-badosh thā tumheñ yaad ho ki na yaad ho

mujhe bhī rok hī legā zamāna
tumheñ bhī yaad aa jā.egī duniyā

ġharaz phir usī ko jo yaad aa.ī merī
to ghabrā ke jis dam huī shaam aayā

shakl terī sāmne āñkhoñ ke hai āThoñ-pahar
yaad terī hai sharīk-e-ranj-o-rāhat mere saath

yaad ab bhūle se bhī sub.h-e-vatan aatī nahīñ
ho ga.ī mānūs aisī shām-e-ġhurbat mere saath

yaad aatā hai ye raftār-e-qamar ko dekh kar
sair kartā thā yuuñ hī vo māh-tal.at mere saath

vo to ruḳhsat kar ke mujh ko ghar meñ jā baiThe magar
yaad un kī duur tak aa.ī thī 'shaukat' mere saath

chaman meñ jab kabhī jaatā huuñ un kī yaad aatī hai
tamannā chuTkiyāñ letī hai pahlū meñ javāñ ho kar

ab tū ne gul na gulsitāñ hai yaad
usī mukhḌe kī har zamāñ hai yaad

ham-nashīñ kah le qissa-e-majnūñ
ham ko bhī dil kī dāstāñ hai yaad

ġhuncha kaaTe thā jis ko dekh ke lab
kyuuñ sabā tujh ko vo vahāñ hai yaad

mustaqil murġh-e-dil jo taḌpe hai
kis kī siine meñ par-fishāñ hai yaad

sabaq-e-girya ashk ko kyā duuñ
aap hī is tifl ko ravāñ hai yaad

gul se kyā muḳhtalit huuñ ai bulbul
mujh ko vo āfat-e-ḳhizāñ hai yaad

aah ai charḳh-e-pīr, 'qā.em' naam
yaañ jo rahtā thā ik javāñ hai yaad