Tags-Yaad

nazar kī had tak muhīt thā silsila mahakte hue guloñ kā
guloñ meñ pariyoñ ke ghar nihāñ the huzūr ko kuchh to yaad hogā

ajiib sāñche kī kashtiyāñ bah rahī thiiñ lahroñ ke zer-o-bam par
ajiib sūrat ke bādbāñ the huzūr ko kuchh to yaad hogā

ulūhiyat aap is hasīñ ittifāq par muskurā rahī thī
sanam ḳhudāoñ ke mehmāñ the huzūr ko kuchh to yaad hogā

jo vāqiye the vo gūñjte zamzamoñ ke mānind maujzan the
jo ḳhvāb the sarv-e-bostāñ the huzūr ko kuchh to yaad hogā

kahīñ kahīñ salsabīl o kausar kī jot maujūd thī zamīñ par
kahīñ kahīñ arsh-o-āsmāñ the huzūr ko kuchh to yaad hogā

shab-e-mohabbat huzūr kī kākuloñ ke khulne ke silsile meñ
'adam' ke isrār kyā javāñ the huzūr ko kuchh to yaad hogā

jis meñ us chhāñv kī yaad aa jaa.e
ab to vo dhuup bhī saayā hai mujhe

rabt-e-bāham ke maze bāham raheñ to ḳhuub haiñ
yaad rakhnā jān-e-jāñ gar maiñ nahīñ to tū nahīñ

dil yuuñ bujhā bujhā sā hī kho kar tumhārī yaad
mahfil meñ jaise sham-e-farozāñ nahīñ rahī

na yaad kī chubhan koī na koī lau malāl kī
maiñ jaane kitnī duur yūñhī ḳhud se be-ḳhabar gayā

yaad terī ik zamāne se hamārī dil meñ thī
tū yahāñ aane se pahle bhī isī mahfil meñ thī

ab tak vo yaad haiñ mirī aglī ināyateñ
bas bas hamāre haal pe tū mehrbāñ na ho

duniyā ke sitam yaad na apnī hī vafā yaad
ab mujh ko nahīñ kuchh bhī mohabbat ke sivā yaad

duniyā-e-tasavvur ham ābād nahīñ karte
yaad aate ho tum ḳhud hī ham yaad nahīñ karte

ek naum suuñ jagā.ūñ agar murda dil ke ta.iiñ
tā-hashr yād-e-haq mane bedār kar rakhūñ

kalī khilī to usī ḳhush-suḳhan kī yaad aa.ī
sabā bhī ab ke chalī sogvār karte hue

tire badan ke gulistāñ kī yaad aatī hai
ḳhud apnī zaat ke sahrā ko paar karte hue

aish-e-rafta kī yaad se hāsil
qissa-e-ḳhuld o zikr-e-ādam kyā

dilā.e yaad jo va.ade to bole jhuñjhlā kar
ye aur hashr meñ lene ko aabrū aa.e

mire dil meñ terī hī yaad hai tū basā huā hai ḳhayāl meñ
hai zabāñ pe terī hī guftugū mire lab pe terā hī naam hai