Tags-Yaad

rakh yaad abhī terā sabaq baaqī hai
is baaġh meñ ab bhī tirā haq baaqī hai

besan kī sauñdhī roTī par khaTTī chaTnī jaisī maañ
yaad aatī hai! chaukā bāsan chimTā phuknī jaisī maañ

ek yaad ek chaa.e kā mag aur kuchh raakh
purānī kitāboñ ke chand piile varaq

haañ yaad aayā is bastī meñ kuchh diye jalā.e the maiñ ne
tum un ko bujhne mat denā bas ye va.ada ik baar karo

jab raat ga.e tirī yaad aa.ī sau tarah se jī ko bahlāyā
kabhī apne hī dil se bāteñ kiiñ kabhī terī yaad ko samjhāyā

phir aaj tire darvāze par baḌī der ke ba.ad gayā thā magar
ik baat achānak yaad aa.ī maiñ bāhar hī se lauT aayā

ġham-e-zamāna se fursat to mil bhī saktī thī
tumhārī yaad se lekin farāġh hī na milā

suhānī raat meñ dilkash nazāre yaad aate haiñ
nahīñ ho tum magar vo chāñd taare yaad aate haiñ

usī andāz se mujh ko sahāre yaad aate haiñ
nahīñ ho tum magar vo chāñd taare yaad aate haiñ

akele maiñ tumhārī yaad se bach kar kahāñ jā.ūñ?
lab-e-ḳhāmosh kī fariyād se bach kar kahāñ jā.ūñ?

kināyoñ ko bhulātā huuñ ishāre yaad aate haiñ
nahīñ ho tum magar vo chāñd taare yaad aate haiñ

tasavvur-āfrīñ vo shāh-pāre yaad aate haiñ
nahīñ ho tum magar vo chāñd taare yaad aate haiñ

mujhe biite hue lamhāt saare yaad aate haiñ
nahīñ ho tum magar vo chāñd taare yaad aate haiñ

tumhāre saath jitne din guzāre yaad aate haiñ
nahīñ ho tum magar vo chāñd taare yaad aate haiñ

ye kyuuñ paiham mujhe paimāñ tumhāre yaad aate haiñ
nahīñ ho tum magar vo chāñd taare yaad aate haiñ

sauġhāt mil rahī hai tirī yaad kī mujhe
is hijr ne sikhā.ī bahut shā.irī abhī

muddatoñ ba.ad use dekh ke hairān hue
shakl bhī yaad na thī

zaḳhm dekhe jism dekhā aur pahchānā use
dhīre dhīre phir mujhe maiñ yaad aane lag gayā

ḳhaak par uḌtī bikhartī purza purza aarzū
yaad hai ye kuchh havā kī āḳhirī yalġhār se

dil-e-fasurda pe sau baar tāzgī aa.ī
magar vo yaad ki jā kar na phir kabhī aa.ī