Tags-Yaad

yaad kartī huuñ apne maazī ko
haal kī qabr meñ paḌī tanhā

chaltī huī bātoñ meñ use kaam paḌe yaad
Thahre hue lafzoñ meñ ijāzat kā kahūñ maiñ

rahtī huuñ terī yaad meñ mad.hosh raat din
tere surūr-o-kaif ne maḳhmūr kar diyā

malba tumhārī yaad kā Dhoyā hai raat din
nāzuk sī ek laḌkī ko mazdūr kar diyā

use bhī yaad rakhnā bād-bānī sā.atoñ meñ
vo sayyāra kanār-e-sub.h-e-fardā aa milegā

tū muskurā ke aaj mujhe kar rahā hai yaad
ya.anī maiñ tere saath tire aa.ine meñ huuñ

royā huuñ yaad kar ke maiñ terī tund-ḳhūī
sarsar ne jab charāġh-e-raushan bujhā diye haiñ

kabhī tire ġham meñ mujh ko ronā kabhī phir aaphī hai chupke honā
jo yaad aatā hai saath sonā to raat kaTtī hai kis fuġhāñ se

mahv se hote hue aḳhbārī shor
yaad kī aahaT achānak taar sī

chalo baañT lete haiñ apnī sazā.eñ
na tum yaad aao na ham yaad aa.eñ

yād-e-ḳhudā se aayā na īmāñ kisī tarah
kāfir bane na ham na musalmāñ kisī tarah

kal aañkh ke shajar se ka.ī phuul yaad ke
palkoñ se ho ke dil kī saḌak ḳhuub bhar ga.e

shab-e-hijr meñ yaad aanā kisī kā
satā.e hue ko satānā kisī kā

vo bholī adā.eñ na kyuuñ yaad aa.eñ
laḌakpan meñ thā kyā zamāna kisī kā

kisī kī yaad ke bādal barasne vaale the
bahut ḳharāb thā mausam so aaj ghar meñ rahe

shikva-e-ġham bhī gayā tāqat-e-goyā.ī bhī
bhuul jaatā huuñ koī baat jo yaad aa.ī bhī

ai ishq na chheḌ aa aa ke hameñ ham bhūle huoñ ko yaad na kar
pahle hī bahut nāshād haiñ ham tū aur hameñ nāshād na kar

us parda-nashīñ ko yaad na kar
ai ishq hameñ barbād na kar

chhoḌ aisī ḳhushī ko yaad na kar
ai ishq hameñ barbād na kar

jī chāhtā hai ik dūsre ko yuuñ aaTh pahar ham yaad kareñ
ā.ankhoñ meñ basā.eñ ḳhvāboñ ko aur dil meñ ḳhayāl ābād kareñ