Tags-Yaad

judā ho gayā hogā jab koī tum se diyā hogā jab tum ko dhokā kisī ne
hamārī vafā yaad aa.ī to hogī hameñ apne nazdīk paayā to hogā

nahīñ aatī to yaad un kī mahīnoñ tak nahīñ aatī
magar jab yaad aate haiñ to aksar yaad aate haiñ

yaad aa.ī to hai shanāḳht magar
intihā ho ga.ī hai ġhaflat kī

jaise ik abr chalā aa.e barasne ke liye
aise aatī hai tirī yaad sar-e-shām mujhe

maiñ kināre pe khaḌā huuñ to koī baat nahīñ
bahtā rahtā hai tirī yaad kā dariyā mujh meñ

kar liyā yuuñ to har ik rañj gavārā lekin
aaj tak dil se tirī yaad ke saa.e na ga.e

dasht-e-afkār meñ sūkhe hue phūloñ se mile
kal tirī yaad ke mātūb rasūloñ se mile

us ko bhūle to hue ho 'fānī'
kyā karoge vo agar yaad aayā

jis roz kisī aur pe bedād karoge
ye yaad rahe ham ko bahut yaad karoge

dāġh-e-dil ham ko yaad aane lage
log apne diye jalāne lage

yaad aatī hai tirī sanjīdgī
aur phir hañstā chalā jaatā huuñ maiñ

yuuñ aatī hai terī yaad ab to
jaise koī duur kī sadā hai

hai duā yaad magar harf-e-duā yaad nahīñ
mere naġhmāt ko andāz-e-navā yaad nahīñ

ye alag ki tujh ko sadā na deñ
hameñ yaad varna tū kab nahīñ

sab ko ham bhuul ga.e josh-e-junūñ meñ lekin
ik tirī yaad thī aisī jo bhulā.ī na ga.ī

shām-e-ġham-e-firāq ke pahlū meñ baiTh kar
aa.ī kisī kī yaad to chupke se ro liye

maiḳhāne meñ kyuuñ yād-e-ḳhudā hotī hai aksar
masjid meñ to zikr-e-mai-o-mīnā nahīñ hotā

yaad apnoñ kī aa.egī us pal
jab koī be-sabab qazā degā

hujūm-e-ġham ke añdhere bhī dil meñ haiñ lekin
kisī kī yaad kī ujlī sī raushnī bhī hai

kis jī se bhulā.ūñgā tujhe ai ruḳh-e-jānāñ
tā-roz-e-abad mujh ko tirī yaad rahegī