Tags-Yaad

bhīgī bhīgī barkhā rut ke manzar giile yaad karo
do hoñT rasīle yaad karo do nain kaTīle yaad karo

tum saath hamāre chalte the sahrā bhī suhānā lagtā thā
gul-posh dikhā.ī dete the sab ret ke Tiile yaad karo

ghuñgrū kī sadā.eñ aatī thiiñ santūr kabhī baj uThte the
māhaul meñ gūñjā karte the sañgīt rasīle yaad karo

ham bhī the kuchh be-ḳhud se tum bhī the mad.hosh bahut
aur ehsās kī cholī ke kuchh band the Dhīle yaad karo

vo pyaar bharī ik manzil thī tā-hadd-e-nazar the phuul khile
tan-man meñ jvālā bharte the manzar rañgīle yaad karo

bhulā.ī nahīñ jā sakeñgī ye bāteñ
tumheñ yaad ā.eñge ham yaad rakhnā

hijr kī shab yuuñ thapak thapak kar mujh ko sulā.e terī yaad
jaise maañ kī lorī sun kar ik bachcha so jaa.e hai

chale duniyā se jis kī yaad meñ ham
ġhazab hai vo hameñ bhūlā huā hai

allāh allāh surūr-e-yād-e-habīb
ab mujhe hijr kā gumāñ bhī nahīñ

yaad rakh dil par na hone paa.e aurat kā asar
muskurā.e bhī agar āñkhoñ meñ āñkheñ Daal kar

shaḳhs hañstā hai jo ā.īne meñ
yaad paḌtā hai kahīñ dekhā hai

tumhārī yaad kī ḳhushbū lagā.ī thī maiñ ne
tamām raat mire jism-o-jāñ mahakte rahe

yuuñ tasallī ko to ik yaad bhī kaafī thī magar
dil ko taskīn tire lauT ke aane se milī

usī kī yaad hai merī hayāt kā hāsil
jo be-niyāz taġhāful se mārtā hai mujhe

shaam aa.ī to koī ḳhush-badnī yaad aa.ī
mujhe ik shaḳhs kī va.ada-shiknī yaad aa.ī

mujhe yaad aayā ki ik daur thā sargoshī kā
aaj usī daur kī ik kam-suḳhanī yaad aa.ī

masnad-e-naġhma se ik rañg-e-tabassum ubhrā
khilkhilātī huī ġhuncha-dahnī yaad aa.ī

lab jo yaad aa.e to bosoñ kī ḳhalish jaag uThī
phuul mahke to mujhe be-chamnī yaad aa.ī

phir tasavvur meñ chalī aa.ī mahaktī huī shab
aur simTī huī be pairahanī yaad aa.ī

haañ kabhī dil se guzartā thā julūs-e-ḳhvāhish
aaj usī tarah kī ik nāra-zanī yaad aa.ī