Tags-Yaad

chup se haiñ kuchh mire āġhosh meñ vo hashr ke din
ye vahī haiñ jinheñ paimān-e-vafā yaad nahīñ

niklī haiñ hashr meñ duniyā kī purānī bāteñ
maiñ to kyā mere farishtoñ ko bhī ab yaad nahīñ

dil se kartā huuñ laakh laakh savāl
yaad aatā hai jab javāb tirā

phir ga.ī ik aur hī duniyā nazar ke sāmne
baiThe baiThe kyā batā.ūñ kyā mujhe yaad aa gayā

ab yaad bhī na aao ki va.ada bhī thā yahī
dasht-e-balā meñ va.ada-e-fardā bhī the hamīñ

koī kartā hai jab hindostān kī baat a 'sāhil'
mujhe iqbāl kā qaumī tarāna yaad aatā hai

har na.ī bazm tirī yaad kā māhaul banī
maiñ ne ye rañg bhī dekhā tirī yaktā.ī kā

tumheñ ab yaad aa.ī hai mirī kyā
Thikāne lag ga.ī āvārgī kyā

tumhārī yaad ke manzar purāne gher lete haiñ
na jaane DhūñDh kar kaise kahāñ se gher lete haiñ

naag kā zahr bhī shīrīñ hai zarā yaad rahe
sar-e-mimbar koī nau-shīnā maqāl aatā hai

yaad us but kī namāzoñ meñ jo aa.ī mujh ko
tapish-e-shauq se har baar meñ baiThā uTThā

ik yaad kī maujūdgī sah bhī nahīñ sakte
ye baat kisī aur se kah bhī nahīñ sakte

jaane kis ummīd pe chhoḌ aa.e the ghar-bār log
nafratoñ kī shaam yaad aa.e purāne yaar log

kabhī bhulāyā kabhī yaad kar liyā us ko
ye kaam hai to bahut mujh se kaam us ne liyā

udaas rahne kī aadat bahut burī hai tumheñ
latīfe yaad karo hañs-hañsā ke so jaao

jab des meñ koī apnā thā pardes meñ kab jī lagtā thā
ab kis ke liye ghar yaad aa.e aur des ko jā.ūñ kis ke liye

us kā nahīñ 'ārif' koī badal aisā hai vo merā jān-e-ġhazal
ab us ke sivā kyā yaad rakhūñ aur us ko bhulā.ūñ kis ke liye

sadqa hotā huuñ jis ghaḌī mujh ko
yaad aatī hai us parī kī qasam

'kaif' fursat nahīñ itnī ki palaT kar dekho
vo samajhtā hai sabaq yaad kiyā hai maiñ ne

bhūle hue haiñ sab ki hai kār-e-jahāñ bahut
lekin vo ek yaad hai dil par garāñ bahut