Tags-Yaad

karte kis muñh se ho ġhurbat kī shikāyat 'ġhālib'
tum ko be-mehri-e-yārān-e-vatan yaad nahīñ

maiñ kab tanhā huā thā yaad hogā
tumhārā faisla thā yaad hogā

bahut se ujle ujle phuul le kar
koī tum se milā thā yaad hogā

bichhī thiiñ har taraf āñkheñ hī āñkheñ
koī aañsū girā thā yaad hogā

udāsī aur baḌhtī jā rahī thī
vo chehra bujh rahā thā yaad hogā

vo ḳhat pāgal havā ke āñchaloñ par
kise tum ne likhā thā yaad hogā

biit chuke vo din vo zamāne rāhat bharī aziyyat ke
yaad kise ab kaun batā.e duurī thī ki vo qurbat thī

tirī yaad jo mere dil meñ hai bas usī kī jalvagarī rahī
mirā ġham bhī tāza-ba-tāza hai mirī shāḳh-e-fan bhī harī rahī

yahī zindagī mirī zindagī yahī zindagī mirī maut hai
tirī yaad ban ga.ī ik chhurī jo mire gale pe dharī rahī

shām-e-ġham se shab-e-andoh se chashm-e-tar se
baaz aayā maiñ tirī yaad ke us lashkar se

dam-e-hashr azal kī bhī yaad kar ye zabān kyā ye nigāh kyā
jo kisī se aaj na ho sakā vo savāl bār-e-digar bhī hai

kaam kyā degā vo TuuTā huā ā.īna bhī
yaad rakhne ko vahī aks vo chehrā hī na ho

ye gul-mohar kī haiñ shāḳheñ kisī ki yaad liye
kisī kī yaad kā chehra nahīñ badalte ham

aur phir dasht-e-junūñ mujh ko bahut yaad aayā
chāk-e-dāmāñ jo abhī maiñ ne siyā pahlī baar

is rāste meñ jab koī saaya na pā.egā
ye āḳhirī daraḳht bahut yaad aa.egā

bichhḌe huoñ kī yaad to aa.egī jīte-jī
mausam rafāqatoñ kā palaT kar na aa.egā

kab tumheñ ishq pe majbūr kiyā hai ham ne
ham to bas yaad dilāte haiñ chale jaate haiñ

bhūle the unhīñ ke liye duniyā ko kabhī ham
ab yaad jinheñ naam bhī apnā nahīñ aatā

yaad kā kyā hai aa ga.ī phir se
aañkh kā kyā hai phir se ro lī hai

chhupī dil meñ jo yād-e-yār hogī
masāfat aur bhī dushvār hogī