Tags-Yaad

sub.h ke vaqt zarre zarre kī
vo munājāt yaad aatī hai

haa.e kyā chiiz thī javānī bhī
ab to din-rāt yaad aatī hai

mai se tauba to kī 'azīz' magar
aksar auqāt yaad aatī hai

tumhārī yaad meñ koī javāb hī na diyā
mere ḳhayāl hī aañsū rahe sadā de kar

ik yaad so rahe ko uThātī hai aaj bhī
ḳhud jāgtī hai mujh ko jagātī hai aaj bhī

kabhī judā do badan hue to diloñ pe ye do azaab utre
bichhaḌne vaale kī yaad aa.ī milan ke āñkhoñ meñ ḳhvāb utre

dar aatī hai chupke se
yaad pe kis kā pahra hai

bhuul baiThe haiñ vo bachpan ke fasāne lekin
yaad hogī unheñ pariyoñ kī kahānī kuchh to

tum mirī aañkh ke tevar na bhulā pāoge
an-kahī baat ko samjhoge to yaad ā.ūñgā

ham ne ḳhushiyoñ kī tarah dukh bhī ikaTThe dekhe
safha-e-zīst ko palToge to yaad ā.ūñgā

is judā.ī meñ tum andar se bikhar jāoge
kisī ma.azūr ko dekhoge to yaad ā.ūñgā

isī andāz meñ hote the muḳhātib mujh se
ḳhat kisī aur ko likkhoge to yaad ā.ūñgā

merī ḳhushbū tumheñ kholegī gulāboñ kī tarah
tum agar ḳhud se na bologe to yaad ā.ūñgā

aaj to mahfil-e-yārāñ pe ho maġhrūr bahut
jab kabhī TuuT ke bikhroge to yaad ā.ūñgā

kabhī chhoḌī huī manzil bhī yaad aatī hai raahī ko
khaTak sī hai jo siine meñ ġham-e-manzil na ban jaa.e

ruuh ne paa.ī hai taklīf-e-judā.ī se najāt
aap kī yaad ko sarmāya-e-rāhat kar ke

duur mujh se rahte haiñ saare ġham zamāne ke
terī yaad kī ḳhushbū dil meñ jab Thahartī hai

kabhī kabhī tū mujhe yaad kar to letī hai
sukūn itnā sā kaafī hai zindagī ke liye

yaad aa hī jaatā hai kabhī nāseh kā qaul bhī
sab kījiye jahāñ meñ mohabbat na kījiye

yaad aa.iiñ chaTkī kaliyāñ
tum jab bhī muskurā.e