Tags-Zindagi

zindagī yuuñ to bahut ayyār thī chālāk thī
maut ne chhū kar jo dekhā ek muTThī ḳhaak thī

zindagī ye mirī aap ke naam hai
bevafā hoñge to kidhar jā.eñge

zindagī ke liye zindagī chāhiye
aap milte rahe to nikhar jā.eñge

kisī ḳhayāl meñ bas zindagī guzar jaa.e
ġham-e-firāq o ummīd-e-visāl hī kyā hai

karam ke is daur-e-imtihāñ se vo daur-e-mashq-e-sitam hī achchhā
na zindagī kī ḳhushī hī achchhī na be-sabātī kā ġham hī achchhā

zindagī kañghiyoñ meñ Dhaal hameñ
terī zulfoñ ke pech-o-ḳham TuuTe

tujh pe marte haiñ zindagī ab bhī
jhuuT likkheñ to ye qalam TuuTe

hameñ bhī hai to ḳhabar dhuup chhāñv kī 'at.har'
ki ham ne bhī to koī zindagī basar kī hai

kaT rahī hai zindagī ab dasht meñ
ham ko kyā matlab rahā hukkām se

jalāo ġham ke diye pyaar kī nigāhoñ meñ
ki tīrgī hai bahut zindagī kī rāhoñ meñ

kahīñ qarīb kahīñ duur ho ga.e 'jāmī'
vo zindagī kī tarah zindagī kī rāhoñ meñ

ufuq ke paar nigār-e-sahar ko kyā ma.alūm
dayār-e-shab meñ guzartī hai zindagī kaise

baḌe dilchasp vaade the baḌe rañgīn dhoke the
guloñ kī aarzū meñ zindagī shole uThā laa.ī

qadmoñ meñ taptī ret thī chāroñ taraf thī aag
aur zindagī ke sar par koī sā.ebāñ na thā

māyūs zindagī ke sahāre chale ga.e
Thukrā ke ham ko dost hamāre chale ga.e

ummīd-o-ārzū kī bahāroñ ke saath saath
gulzār-e-zindagī ke nazāre chale ga.e

raushan thī jin se merī shab-e-zindagī nadīm
jaane kahāñ vo chāñd sitāre chale ga.e

aas hī se dil meñ paidā zindagī hone lagī
sham.a jalne bhī na paa.ī raushnī hone lagī

kiyā karte the bāteñ zindagī-bhar saath dene kī
magar ye hausla ham meñ judā hone se pahle thā

ab ġham kā koī ġham na ḳhushī kī ḳhushī mujhe
āḳhir ko raas aa hī ga.ī zindagī mujhe