Tags-Zindagi

vo qatl kar ke mujh ko pashemāñ hue to kyā
lauTā sakeñge phir na mirī zindagī mujhe

neza uThā.e phirtī hai har raah meñ qazā
har moḌ par hirās milī zindagī mujhe

jo guzrī hai hamārī zindagī par
na jaa.e vo hamāre kārvāñ tak

hadīs-e-zindagī 'jāñbāz' chheḌo
hadīs-e-sho.ala-o-shabnam kahāñ tak

ek aahaT se jāgtī huuñ maiñ
ek dastak hai zindagī merī

vo merī ḳhvāhish kī lauh-e-tishna pe zindagī ke savāl ubharnā
vo us kā harf-e-karam se apne qubūliyat ke javāb likhnā

kis ne dekhā shaguftagī kā ma.aal
zindagī itnī dūr-ras bhī nahīñ

shahr ke shahr hī behosh paḌe pūchhte haiñ
zindagī apne amal-dāroñ se nālāñ kyuuñ hai

kahī zindagī bhar kī shab vārdāt
mirī ruuh paiġhām-bar ho ga.ī

farhat-e-bandagī milī tābish-e-zindagī milī
dil se jo ek baar maiñ mahv-e-namāz ho gayā

maiñ jab bhī dekhtā huuñ zindagī kā pichhlā varaq
to aisā lagtā hai dil meñ kuchal ga.ī koī shai

hamārī zindagī garche thī muntashir pahle
jo vaqt aayā to sāñche meñ Dhal ga.ī koī shai

kahāñ se jaan paḌe zindagī ke murdoñ meñ
adā-e-husn qayāmat agar bapā na kare

bazm-e-takallufāt sajāne meñ rah gayā
maiñ zindagī ke naaz uThāne meñ rah gayā

bāzār-e-zindagī se qazā le ga.ī mujhe
ye daur mere daam lagāne meñ rah gayā

ḳhairiyat pūchhne ko aa.ī hai
zindagī mujh ko dekh kar tanhā

sā.ateñ detī hī rahīñ āvāz
zindagī chal paḌī kidhar tanhā

zindagī dekh le nazar bhar ke
ham haiñ shāmil tire ḳharāboñ meñ

'rahbar' ye zindagī thī bahut mo'atabar magar
merā vajūd mujh ko tamāshā banā gayā

tū hī markaz hai merī zindagī kā
tire atrāf misl-e-dā.era huuñ