Tags-Zindagi

baḌī ustād hai ye zindagī bhī
lo mujh ko zahr piinā aa gayā hai

saaya hai zindagī pe vo yās-o-umīd kā
har shab shab-e-darāz bhī hai muḳhtasar bhī hai

'dānish' ab tīroñ kī zad meñ aa gayā
zindagī se sāmnā hone lagā

yahī asāsa the zindagī kā ye ḳhvāb hī the mirā sahārā
tire taġhāful ke sañg-rezo se kirchiyoñ meñ jo baT ga.e haiñ

zindagī se baḌī sazā hī nahīñ
aur kyā jurm hai patā hī nahīñ

zindagī maut terī manzil hai
dūsrā koī rasta hī nahīñ

zindagī ab batā kahāñ jaa.eñ
zahr bāzār meñ milā hī nahīñ

maiñ ki amboh-e-azīzāñ meñ kisī kā bhī nahīñ
zindagī mujh se lipaT jā ki maiñ terā ho jā.ūñ

dekh le tū agar mohabbat se
zindagī kāmyāb ho jaa.e

zamāna thā vo dil kī zindagī kā
tirī furqat ke din lā.ūñ kahāñ se

vo ek lamha jo dastaras meñ nahīñ rahā hai
vo zindagī bhar kī rā.igānī se muḳhtalif hai

devtā mere āñgan meñ utreñge kab zindagī bhar yahī sochtā rah gayā
mere bachchoñ ne to chāñd ko chhū liyā aur maiñ chāñd ko pūjtā rah gayā

duniyā vahī hai aur vahī sāmān-e-zindagī
lekin badalte rahte haiñ unvān-e-zindagī

kyā kaam kar rahā hai ye mehmān-e-zindagī
bhartā hai kyuuñ gunāh se dāmān-zindagī

vahshat-nasīb hai sar-o-sāmān-zindagī
ulfat meñ taar taar hai dāmān-zindagī

hai dekhne kī chiiz bhī kuchh dekhtā hai kyā
sair-e-jahāñ hai ḳhvāb-e-pareshān-e-zindagī

kaafī hai apne vāste ārā.ish-e-vajūd
ārā.ishoñ se paak hai dāmān-zindagī

maujoñ se kheltā huā bāhar nikal na jā
āḳhir ye kis liye ġham-e-tūfān-e-zindagī

ik din hayāt-o-maut kī is khīñch-tān meñ
hāthoñ se chhūT jā.egā dāmān-e-zindagī

marnā hī jab jahāñ meñ hai jiine kā mā-hasal
nāhaq uThā.eñ kis liye ehsān-e-zindagī