Tags-Zindagi

tirā husn hai mirī zindagī tirā ishq hai mirī āshiqī
tirī fikr hai mirī shā.irī tirā zikr mere kalām se

tirā soz-e-ishq hai zindagī tirā jazb-e-husn hai be-ḳhudī
tujhe pā ke ḳhush hai tirā 'zakī' nahīñ kaam aish-e-davām se

pahelī zindagī kī kab tū ai nādān samjhegā
bahut dushvāriyāñ hoñgī agar āsān samjhegā

zaḳhm-e-furqat ko palkoñ se siite hue saañs lene kī aadat meñ jiite hue
ab bhī zinda ho tum zindagī ne kahā zindagī ke liye ek taaza ġhazal

maiñ ibādat bhī huuñ maiñ mohabbat bhī huuñ zindagī kī numū kī alāmat bhī huuñ
merī palkoñ pe Thahrī namī ne kahā is namī ke liye ek taaza ġhazal

terī sūrat par gumān-e-dasht-o-sahrā haa.e haa.e
tere qadmoñ meñ bahāreñ zindagī ai zindagī

ikkīs saal umr thī us kī bas
abhī us ne goyā zindagī ko aañkh bhar ke dekhā bhī na thā

vo zindagī thī aap the yā koī ḳhvāb thā
jo kuchh thā ek lamhe ko bas sāmnā huā

maut aur zindagī ke rishtoñ meñ
fāsle kuchh ajiib hote haiñ

zindagī se kyā laḌeñ jab koī bhī apnā nahīñ
ho ke shal dhāre ke ruḳh par ham ko bahnā aa gayā

ishq mahv-e-ġham-e-zindagī ho gayā husn madhosh-e-ishva-tarāzī rahā
ahl-e-dil hosh meñ aa chuke haiñ magar hai vahī ālam-e-dil-barāñ aaj tak

ġhalat hai ham-nafaso un kā zindagī meñ shumār
jo din ba-ḳhidmat-e-pīr-e-muġhāñ nahīñ guzre

kyā ġhazab hai zindagī kī dauḌ meñ
rāhzan aage baḌhā rahbar girā

hamesha zindagī kī har kamī ko jiite rahte haiñ
jise ham jī nahīñ paa.e usī ko jiite rahte haiñ

rāz-e-nihāñ thī zindagī rāz-e-nihāñ hai aaj bhī
vahm-o-gumāñ meñ thī vahm-o-gumāñ hai aaj bhī

kal bhī ruḳh-e-hayāt par rañg-e-shaguftagī na thā
sub.h-e-bahār-e-zindagī shām-e-ḳhizāñ hai aaj bhī

ġham nahīñ lā-hāsilī kā ishq kā hāsil hai ye
ai hisāb-e-zindagī tujh ko to puurā kar diyā

vābasta-e-bahār ho ḳhud misl-e-rañg-o-bū
yuuñ zindagī guzār kisī gul-e-badan ke saath

kyā kisī badlāv se ye zindagī badlī kabhī
kyuuñ na.ī vo roz apnī shaḳhsiyyat kartā rahā

aaj samjhā Thokaroñ ke ba.ad bhī hai zindagī
kyuuñ atā mujh ko 'musāfir' ye sifat kartā rahā