Tags-Zindagi

ab is maqām pe laa.ī hai zindagī mujh ko
ki chāhtā huuñ tujhe bhī bhulā diyā jaa.e

bahut qarīne kī zindagī thī ajab qayāmat meñ aa basā huuñ
sukūn kī sub.h chāhtā thā so shām-e-vahshat meñ aa basā huuñ

duniyā se kaun jaatā hai apnī ḳhushī ke saath
vābasta ho agar na azal zindagī ke saath

bas itnī rasm-o-rāh hai is zindagī ke saath
ik ajnabī safar meñ milā ajnabī ke saath

muTThiyoñ meñ ḳhaak le kar dost aa.e vaqt-e-dafn
zindagī bhar kī mohabbat kā silā dene lage

aa umr-e-rafta hashr ke dam-ḳham bhī dekh leñ
tūfān-e-zindagī kī vo halchal uThā to lā

zindagī aaj terā lutf o karam
kam agar hai to aaj kam hī sahī

kyā burā thā band hī rahtī nazar
zindagī be-kaif sī hai āj-kal

āñkhoñ meñ bas ke dil meñ samā kar chale ga.e
ḳhvābīda zindagī thī jagā kar chale ga.e

zarā sī chaa.e girī aur daaġh daaġh varaq
ye zindagī hai ki aḳhbār kā tarāshā hai

yaas kī badlī yuuñ dil par chhā ga.ī
zindagī se zindagī uktā ga.ī

zindagī ye dekh kar us ke sitam
maut bhī insān se ghabrā ga.ī

koī mujh se judā huā hai abhī
zindagī ek sānehā hai abhī

saarī bāteñ ye ḳhvāb kī sī haiñ
zindagī duur kī sadā hai abhī

hai sābiqa hazār marāhil se aur phir
is zindagī ke ba.ad bhī kuchh marhale haiñ yaar

maiñ apne jism ke murda ajā.ib-ghar kī zīnat huuñ
mujhe dīmak kī sūrat chāTtī hai zindagī merī

zindagī jazba-e-rūmān-e-musalsal hī sahī
tere ehsās se rūmān badal jaate haiñ

nit na.ī umīdoñ ke Taañk Taañk kar paivand
zindagī ke dāman ko umr-bhar siyā ham ne

ranj-o-ġham uThā.e haiñ fikr-o-fan bhī paa.e haiñ
zindagī ko jitnā bhī jī sake jiyā ham ne

zindagī kyā hai aur kyā hai ajal
tum se milnā tumheñ judā karnā