Tags-Zindagi

samjhe hue the ham jise aish-o-tarab kā ghar
zindān-e-ġham banā hai vo aivān-e-zindagī

piirī chalegī kyā mirī piirī ke daur meñ
aa.e kahāñ se pahlī sī ab shān-e-zindagī

hai fasl-e-gul kā zor bahāroñ pe hai shabāb
kyā pur-fazā hai aaj gulistān-e-zindagī

kis se vafā kī dahr meñ 'ḳhushtar' umiid hai
ahd-e-vafā se duur hai paimān-e-zindagī

kitne ā.īnoñ meñ ik aks dikhāyā hai mujhe
zindagī ne jo akelā kabhī paayā hai mujhe

zāhid ko zindagī hī meñ kausar chakhā diyā
rindoñ se aaj ye bhī karāmāt ho ga.ī

ajab mausam milā hai zindagī ko
na.ī rut hai daraḳhtoñ par samar na.iiñ

zindagī kā ye mirī kaun hai qātil jaane
maiñ huuñ mushkil meñ sazā duuñ to sazā duuñ kis ko

jidhar ho zindagī mushkil udhar nahīñ aate
ajal se pahle mire chāra-gar nahīñ aate

dekh kar saaqī kī mastāna nigāhī ai 'guhar'
zindagī ko ham ne vaqf-e-jām-o-mīnā kar diyā

kuchh din se zindagī mujhe pahchāntī nahīñ
yuuñ dekhtī hai jaise mujhe jāntī nahīñ

zindagī tere liye sab ko ḳhafā ham ne kiyā
apnī qismat hai ki ab tū bhī ḳhafā ham se huī

ham apnī zindagī kī har ḳhushī ko kyuuñ na ġham samjheñ
jo tere ġham kā hāsil hai usī kā naam rāhat hai

mazāq-e-zindagī ko hai shu.ūr-e-zindagī lāzim
vahāñ jiine meñ rāhat hai jahāñ marnā sa.ādat hai

ashk bhī hoñ ruḳh-e-tabassum par
zindagī yuuñ jiyā nahīñ karte

hādsoñ kī maar se TuuTe magar zinda rahe
zindagī jo zaḳhm bhī tū ne diyā gahrā na thā

zabt bhī chāhiye zarf bhī chāhiye aur mohtāt pās-e-vafā chāhiye
zindagī dushmanoñ meñ bhī mushkil nahīñ aadmī meñ zarā hausla chāhiye

dil ko hāsil ḳhushī nahīñ hotī
ek pal zindagī nahīñ hotī

guzāra is pe bhī kar to rahe haiñ
magar tū hī batā ye zindagī hai

apne man meñ Duub kar pā jā surāġh-e-zindagī
tū agar merā nahīñ bantā na ban apnā to ban