Tags-Zindagi

huā yuuñ ki phir mujhe zindagī ne basar kiyā
koī din the jab mujhe har nazāra hasīñ milā

bevafā.ī kā chalan aam hai duniyā meñ 'kiran'
zindagī bhar ke liye zaḳhm sahā kaise kareñ

ye sab rañgīniyāñ ḳhūn-e-tamannā se ibārat haiñ
shikast-e-dil na hotī to shikast-e-zindagī hotī

jo bujhī sham-e-dil to baḌhī raushnī jo piyā zahr-e-ġham to baḌhī zindagī
ye tū hī ab batā zarā munsifī ye tirā kaam thā ki mirā kaam thā

tire bin
zindagī se ḳhauf aatā hai

ye zindagī to sarī-uzzavāl hai 'najmī'
dil apnā is ke liye kyuuñ lahū karūñgā maiñ

zindagī gard gard thī 'aḳhtar'
jaane luT kar kahāñ se aa.ī thī

zindagī kā bhī kiyā bharosā hai
zindagī kī qasam bhī kyā khā.ūñ

mujhe talāsh thī jis kī vahī kabhī na milī
har ek chiiz milī ek zindagī na milī

bahut na thoḌā sar-e-ām zindagī kā shor
ki darmiyān hī sunte haiñ ik sadā baaqī

na jaane ḳhvāb haiñ kitne tamannā.eñ khilaunoñ sī
magar ye zindagī un se to bahlā.ī nahīñ jaatī

kahānī zindagī kī yuuñ to dilkash hai magar 'vāhid'
koī ik baar jo paḌh le to dohrā.ī nahīñ jaatī

yahī sukūn mirī be-kalī na ban jaa.e
ki zindagī meñ koī vaj.h-e-intizār nahīñ

zindagī hai lahū kā ik chhīñTā
umr zaḳhmoñ kī dīp-mālā hai

maut kā vaar to meñ sah gayā hañste hañste
zindagī tū hī koī choT lagā kaarī sī

zindagī tujh se kyā umiid rakhūñ
tū kahāñ mere iḳhtiyār meñ hai

hotā nahīñ zauq-e-zindagī kam
buniyād-e-hayāt hai tirā ġham

be-samt zindagī kā safar ban kī raat hai
nāgin sā vaqt Das ke achānak palaT na jaa.e

'bedam' kī zindagī hai isī chheḌ-chhāḌ meñ
tark-e-vafā kī tarah se tark-e-jafā na ho

kabhī hadd-e-nazar meñ aur kabhī imkāñ se bāhar
hameñ to us ne saarī zindagī hairān rakkhā