Tags-Zindagi

tere sūraj ko tirī shaam se pahchānte haiñ
zindagī ham tujhe anjām se pahchānte haiñ

pā sake ḳhūñ-bahā diyat na qisās
zindagī ke lavāhiqīn āḳhir

yā mirī aañkh se chhīn le sab ḳhazāna-e-ḳhvāb
yā mirī ḳhaak se zindagī kā fishār uThā

zindagī kā lutf hai uḌtī rahe har-dam 'riyāz'
ham hoñ shīshe kī parī ho ghar parī-ḳhāna rahe

ab kyuuñ na zindagī pe mohabbat ko vaar deñ
is āshiqī meñ jaan se jaanā bahut huā

zindagī bāñjh sī aurat thī ki jis ke dil meñ
buuñd kī pyaas bhī thī aañkh meñ sailāb bhī the

kabhī dil meñ mohabbat ke hasīñ mausam nikharte haiñ
kabhī mujh se lipaT kar zindagī bhī raqs kartī hai

mujhe merī mohabbat par bahut hī maan hai 'vishma'
usī ke naam se ab zindagī kī saañs chaltī hai

ā.ina-e-sarāb hai gard pas-e-habāb hai
Thahrī huī hai zindagī phir bhī ise ravāñ kaho

faqat zabāñ se nā kah mujh ko zindagī apnī
maiñ zindagī huuñ tū achchhī tarah guzār mujhe

binā ro.e guzarnā us galī se
lagā aisā ga.e ham zindagī se

jhalak ik maut kī dekhe to mānūñ
jise Dar lag rahā hai zindagī se

kal tak to zindagī thī tamāshā banī huī
aur aaj zindagī bhī tamāshā.iyoñ meñ hai

zindagī jab nā-shanāsī kī sazā bantī ga.ī
rābtoñ kī ḳhud mujhe mīzān ho jaanā paḌā

mirī zindagī meñ shāmil jo na terā pyaar hotā
to nashāt-e-do-jahāñ bhī mujhe nāgavār hotā

raah ke pattharoñ se bhārī hai
ham ne kyā zindagī guzārī hai

mujh pe phūloñ kā qarz hai maiñ ne
zindagī shāḳh se utārī hai

sard dinoñ kī tarah gum ho ga.ī apnī zindagī
farq kahāñ rahā koī maah meñ aur saal meñ

zindagī ne mirā pīchhā nahīñ chhoḌā ab tak
umr bhar sar se na utrī ye balā kaisī thī

jitnā bahtā gayā zindagī kā lahū aur hote ga.e hausle surḳh-rū
sahl hotī ga.ī manzil-e-justujū rāste aur hamvār bante ga.e